Sverigimi napparsimmavinni saarngumikkut suliaritittussat immikkoortortaanni arlalinni pujortartartunik pilattaasarnerit sukaterneqarput. Danmarkip Radioata nittartagaani tamanna atuarneqarsinnaavoq.
Pujortartuugaanni pilatsereernikkut aseruuttorsinnaaneq pujortartuunngitsunit marloriaammik anneruvoq, taamaammat pujortartartut pilersaarutaareersumik pilatsinnissaminnut utaqqisuniikkaluartut Sverigimi napparsimmavinni nakorsat taamaatiteraannarpaat.
Nordlandimi napparsimmavissuaq pujortartartunik pilattaajumanngitsunut siullersaavoq, napparsimmaviillu sisamat maanna ilanngupput.
Taamatulli aalajangerneq svenskinit tamanit naammagineqanngilaq.
- Assigiinngisitsinerarneqarpugut, pujortartartunilli pilattaarusukkunnaarnitsinnut peqqutaavoq napparsimasuutitta isumannaatsuunissaat pingaartikkatsigu. Aseruuttoornerit, puatsigut nappaateqarnerit ikillu mamikkumaataarpata uninngasut isumannaatsumiinnavianngillat, Umeåmi napparsimmavimmi saarngit immikkoortortaanni pisortaq, Olle Svensson, oqarpoq.
Pujortartartut pujortarunnaarnissaannik neqeroorfigineqassapput, qaammatillu marluk pujortarsimanngikkunik aatsaat pilatsissinnaanngussallutik.