Sverigemi umiarsuit arlallit sikkussaaqqapput

Østersømi sikusimanera pissutigalugu svenskit imaatigut angalaniarnerat ajornartorsiutigineqarpoq. Umiarsuit 51-it tamani tamaani sikkussaaqqapput.
Allattoq Jaaku Lyberth
marsip 05-at 2010 06:18

Østersømi sakkortuumik anorlerpoq, umiarsuillu sikkussaaqqasut ajornartorsiuteqarnerat ajorneruliinnarluni. Sakkortuumik anorlernera ualimut sakkukinnerulernavianngitsoq nutaarsiassaqartitsivik ritzau taamatut allaaserisaqarpoq.

Umiarsuit Østersømiittut arlaqartut ikiorneqarnissaminnik pisaqariartitsipput.

Umiarsuit ilaasunik angallassisartut marluk katillugit 1841-nik ilaasoqartut ingerlariaqqissinnanngillat.

Umiarsuaatileqatigiiffiup Viking Linep umiarsuaa Isabella 1153-inik ilaasoqartoq, ippassaq unnukkut arfineq-marluk missaani nammineerluni sikumit kaanngarluni ingerlaqqippoq.

Umiarsuaq ilaasunik angallasisartoq Amorella ippassaq unnukkut ikiorneqarluni ingerlaqqippoq. Umiarsuaq taanna ippassaq ulloq naallugu sikkussaaqqalluni ingerlariaqqissinnaasimanngilaq, taamaalineranilu umiarsuarmit allamit aporneqarpoq, annikitsumik ajoquserluni.

Angallatit marluk Østersømi Norrtäljap avataani sikkussaaqqasut umarsuarnit sikusiutinit ikiorneqarlutik kaanngaartinneqarlutik ingerlaqqipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq