Sulinermut ministeri, Sven Otto Littorin, pingasunngormat tunuarpoq, aviisimilu Aftonbladet-imi allaaserineqartut malillugit, Sven Otto Littorinip akiliilluni arnamik 2006-imi atoqateqarnera aviisip saqqummiummagu tunuarsimavoq.
Taama pisuutitsilluni saqqummiussinerit Littorinip nammineq oqaaseqarfigisimanngilai, ministeriunerli, Frederik Reinfeldt, tusagassiortunik ippassaq katersortitsigami ilaatigut oqarpoq, tunuarnissani ullormik ataatsimik sioqqullugu ministeri oqartoq, arnamik akilerlugu atoqateqarsimaneragaanini ilumoortortaqanngitsoq.
Akiliilluni atoqateqartarneq Sverigemi inerteqqutaavoq. Sven Otto Littorinip tunuarnerminut pissutaanerarpaa nammineq inuttut ajornartorsiuteqarami ministeriunerup Frederik Reinfeldtip naalakkersuisuini suleqqinnissani artulerlugu.
Arnap 30-nik ukiullip, aningaasanik akilersilluni Littorinimik atoqateqarnerartup, aviisimit Aftonbladet-imit apersorneqarnera ippassaq saqqummersumi atuarneqarsinnaavoq. Ministerimut tunuartumut oqarasuaatikkut sianersimanerit aviisip aamma nassaarisimallugit isumaqarpoq.