Sverigemi kunngissaq katippoq
Daniel Westling prins Danielimik ullumimiit taaguuteqalerpoq, taaguutaa tamakkerlu tassaalluni prins Daniel af Sverige, hertug af Västergötland.
Victoria qaqqorivinngitsumik qillilaartumik naatsunik talilimmik siilikimik kjuuleqarpoq, uniakalaava 5 meteriulluni. Katissutaa kjuuleq ilusilersuisartup Victoriap nuannarinerpaasaata, Pär Engshedenip, ilusilersugaraa. Danmarkip Radioata nittatagaani tamanna allaaserineqarpoq.
Niviarsiaqqat nukappiaqqallu katillugit qulit Victoriap oqaluffimmut iseqatigai. Nukappiaqqat umiartortutut atisaqarput, niviarsiaqqallu qaqortunik takisuunik kjuuleqarlutik.
Kunngissaq Victoria prins Danielilu Stockholmimi oqaluffimmi Storkyrkenimi katipput. Victoria angutaata eqquppaa, issiavissaminullu apuutingajalermat uissaata apuukkiartorlugu.
Kunngissap angajoqqaavi, Kunngi Carl Gustav nulialu dronning Silvia, oqaluffimmi tassani, ullorlu unarpiaq, ukiut 34-t matuma siorna katipput. Dronning Silviallu taamanikkut niaqorutaasaa uniakalaavalu Victoriap ullumikkut aamma atorpai.
