Sverigemi aallaasersortoq suli tigusarineqanngilaq

Sverigemi nunasisut arnat marluk Malmøp ilaani, Kroksbäckimi ippassaq ualigaa aallaasersorfigineqarput. Aallaasersortoq kinaanersoq suli maannamut ilisimaneqanngilaq.

Arnat taakku marluk angerlarsimaffimminni igalaat saanniitillutik aallaasersorfigineqarsimasut politiit nalunaarutigaat.

Arnap aappaa inuusunneq eqqortingajappoq, ikinngutaalu talimigut eqqortilluni. Taanna nakorsanit ippassaq unnukkut suliarineqarpoq.

Malmømi piffissami kingullermi allaasersornerit ammit qalipaataannik immikkoortitsinermik tunngaveqartoq politiit ilimagaat, taamaammat politikkikkut ingasaassillutik talerperliuniat nakkutigineqarluartut, aviisimi Kvällspostenimi allaaserineqarpoq.

- Paasiniaanitsinnut taakku ilaaginnarput. Pasiniakkagut aamma allanut sammipput siammasinnerullutillu, politiit pisortaat Mats Lassen oqarpoq.

Aallaasersornerni suli tigusarinnittoqarsimanngitsoq svenskit politiivisa nalunaarutigaat, taamaammat politiit sulisissinnaasatik tamaasa paasiniaanerminnut atorniarpaat.

Malmømi ukiuni kingullerni aallaasersornernut 15-inut inuk ataasiinnaq taamaaliortarsimasoq politiit ilimagaat, aamma taakku ilimagaat pinerliisoq angutaasoq 20-t 40-llu akornanni ukioqarunartoq.

Inuit arlallit oqaluttuarisimavaat pinerliisoq takusimallugu, tamannali maannamut suli uppernarsineqanngilaq.