Puisip neqaanik assigiinngitsorpassuarnik nerisassiornissamut ilitsersuut, Svenskit atuakkiorfianit Svenskisut Finskisut Norskilullu atuarneqarsinnaasoq saqqummersinneqarpoq.
Neriniartarfiit arlallillit igasullu aqqaneq-marluusut igaarisartagaat pitsaanersiukkat, nerisassiornermut ilitsersuummi naqinneqarsimapput.
Piniarnermut kattuffimmeersup Åke Granström-ip atuakkamik saqqummersitsinissaq suliarisimavaa.
Sorsunnersuup aappaa tikillugu Svenskit puisip neqaanik nerisarsimagaluarput, puisilli ikilimmata nerineqartarneri akuttusisimallutik. Maannakkulli puisit amerleqqilermata, Sverigimi puisitortarneq akulikinneruleriartorpoq.
- Puisit amerliartuinnarmata neqimik piumasut amerlanerulissapput tunisassiaqarnerulerlutalu, Åke Granström oqarpoq nangillunilu: - 1980-kkuni atuagaq saqqummersinneqarsimanavianngikkaluarpoq, taamanikkummi Greenpeace-ip Kalaallit Nunaata puisinniartarnera aserungajalluinnarsimavaa.
Maannakkut aamma puisinik uumasuuteqartoqartalersimavoq, taakkualu aamma nerineqartariaqarput Granström naggasiivoq.