Svenskit nunanut allanut ministeriat tunuarpoq
Sverigemi nunanut allanut ministeri Laila Freivalts Danmarkimi Muuamaamik titartakkat peqqutigalugit tunuarniarluni ullaaq tusagassiortunik katersortitsinermini nalunaaruteqarpoq.
- Nunanut allanut ministeritut sulinera naalakkersuisooqatigiit, partiimut ilaasortaaffigisannut kiisalu nunanut allanut ministereqarfimmut ajoqutaasorigakku tunuarniarlunga aalajangerpunga, Laila Freivalts oqarpoq.
Tunuarniuteqarnera ilaatigut ima oqaluttuassartaqarpoq:
Sverigemi partiinut talerperlernut qaninniartut nittartakkaminni Muuamaamik titartakkat sammineqaleruttorfianni februaariugaa saqqummersitsipput. Kisianni nunanut allanut ministereqarfiup politiillu nittartagaatilik saaffiginniffigeriarlugu nittartagaq matuaat.
matusinerup kingorna Laila Freivalts tamat oqarsinnaatitaanerannik killiliisutut isornartorsiorneqartorujussuanngorpoq. Isornartorsiorneqarlunilu aallartimmat nalusaminik atorfilittani nittartakkamik matusisimanerarpai, kingusinnerusukkulli paasineqarpoq unneqaserlulluni taamatut nalunaaruteqarsimasoq.
Unneqqaserlunnera paasineqarmat sallusimasutut unnerluutigineqarpoq kiguninngualu naalakkersuisunut illuatungiliuttunit tunuarniuteqarnissaa piumasarneqarpoq.
Sverigemi ministeriuneq tusagassiortunik katersortitsinermi peqataasoq aperineqarpoq Laila Freivaltsimit salloqittarneqarsimasutut misigisimanersoq, ima akivoq:
- Paatsooqatigiittarsimavugut attaveqaqatigiinnerpullu pitsaanerpaanngilaq. Taamaakkaluartorli salloqittarneqartutut misigisimanngilanga. Laila Freivaltsip tunuarniuteqarnera ministeriunerup ajuusaarutigigaa Sverigemi naalakkersuisunik malinnaasut isumaqarput naalakkersuisooqatigiit naalasseriitsortaat ministeriunermik ilungersuatitsiunnartoq tunuarnini pissutigalugu.
Svenskerpassuit Laila Frevaltsip tunuarnissaa utaqqiinnarsimavaat. Muuamaamik titartakkat kisimik peqqutaanngillat 2004-imi juullip naggataani tassaarsuaqarnerani nunanut allanut ministereqarfiup ikiuerpiarsimannginnera pillugu aamma Laila Freivalts tunuaqquneqartarsimavoq.
