Svend Auken ullumikkut ilineqarpoq

Ulloqeqqata siorna Christiansborg Slotskirkemi persuarsiornartumik eqqaaniarneqarpoq.

Århusip biskoppia Kjeld Holm, folketingip siulittaasua Thor Pedersen socialdemokratillu siulittaasuat Helle Thorning Schmidt oqaaseqarput. Kjeld Holmip Svend Auken socialdemokratini pingaartutut inissisimasimasumut Thorvald Stauningimut assersuuppaa, oqarluni naammagittartuunerarlugu.

Aammattaaq Svend Aukenip ajornartorsiortaraluarluni isumagissuunera ersersippaa oqaatigalugulu inunnik isumassarsisitsillaqqissuusoq.

-Svend isertuartuunngilaq, naamerluinnaq, kikkunnulluunniit tamanut inussiarnersuuvoq. Taannalu aamma oqarpoq, Svend Auken angusaqarniarnermini ajugaanerpassuarnik atugaqarsimasoq, taavalu aamma biskoppi erseqqissaavoq tamanna illuatungeqarsimasoq.

Thor Pedersen erseqqissaavoq, Svend Auken tassaasoq danskit politikeriini imaannaannginnerpaasoq, folketingimilu siulittaasup tulliatut inuinnaat aqutsineranni paarsisutut taaneqartarnerani kikkut tamarmik qutsavigisariaqagaat. Pissaaneqarnerit pissaanikinnerusunik qunusiarinninnginnissaat Svend Aukenip ilungersuutigisimavaa, Thor Pedersen oqarpoq.

Ualiartoq Svend Auken Frederiksbergip oqaluffianiit ilineqarpoq, qatanngutaatalu palasip SF-imilu politikerip Margrethe Aukenip issumeerlugu. Eqqaaniaanermi ilaatigut peqataapput Naalakkersuisut siulittaasuat Kuupik Kleist kiisalu Siumukkut siulittaasuat Aleqa Hammond. Svend Auken sivisuumik napparsimareerluni marlunngormat toquvoq.