Svalbardimi nannunik nakkutilliisoq
Taassumami nannut 3.000-it missaanniittut, Svalbardip issittortaani uumasuusut, nakkutigissavai.
Norgemi nittartakkat ilaat, nordlys.no, taama allaaserisaqarpoq.
Svalbardip issittortaani ilisimasassarsiortut nannunik nakkutilliisup mianersoqqusassavai, ilisimasassarsiorlutik sulileruttornerminni nannunit kaattunit qanillattorniarneqaleqqunagit.
Nannunik nakkutilliisutut atorfeqassagaanni, nannunik takunnissinnaalluartuusariaqarpoq, aallaasinik atuilluarsinnaasariaqarluni, isumannaallisaanermullu pikkorissarsimanissaq aamma piumasaqaatigineqarpoq.
Sulisussatulli toqqarneqartup nippaarissuuguni aallaasit atortariaqartassanngilai, nippaarikkunimi nannut tatamitissinnaassagamigit.
Nannunik nakkutilliisuunissaq juulimi sapaatip-akunnerini pingasuni suliffiussaaq, soqutiginnittullu maajip ulluisa 27-at nallertinnagu qinnuteqarsinnaapput, qinnuteqarfissaq ullormut tassunga killeqarmat.
