Svalbard Norgemi kiannerpaasoq
![](/sites/default/files/styles/image_934x467/public/article_images/unis_-_svalbard_universitet_knr.jpg?itok=TGvoMxNT)
Qeqertat Norgemut atasut Svalbard Norge tamakkerlugu marlunngormat ullaakkut kiannerpaasimasoq, Norgemiut silasiornermut instituttiat paasissutissiivoq.
Norgemi kiassutsit marlunngormat ullaakkut uuttorneqartut, kiannerpaaffigisaat tallimat Svalbardimi nalunaarsorneqarput.
Kiannerpaasutut uuttorneqartoq, 4,1 graderinik kiatsigisoq piiaaffimmi Sveagruvami Spitsvergenimiittumi uuttorneqarpoq.
Nunarsuarmi inoqarfiusuni Svarbard avannarpasinnerpaat ilaanniimmat taama kiatsiginera nalinginnaasuunngilaq.
Norgep nunataani kiassutsini uuttorneqartoq qaffasinnerpaaq 2,8 graderinik kiatsigaaq. Tamannalu Norgep kitaatungaani Mørep Romsdalillu nalaani uuttorneqarpoq.
Naqitsinertuffik kangianiittoq Norgep nunataanit silaannarmik nillertumik nassataqarmat taannalu Islandip kujataatungaanit naqitsiniisaffik Svalbardip tungaaniittoq neruminnerusitsimmat Svalbardip avannaatungaa ilanngullugu kianneruvoq.
Svalbardip kiannerpaaffigisaatut uuttorneqarnikuni, Svalbardimi illoqarfimmi pingaarnermi Longyarbyenimi 2012-imi februaarimi uuttorneqarnikuuvoq tassanilu arfineq marlunnik kiassimalluni.
- Taama kiatsigineranut rekordi sapaatip akunnerata ingerlanerani qaangerneqarsinnaavoq, norgemiu silasiortoq Unni Thomsen norgemiut aviisianut VG-mut oqarpoq.
Svalbardimi kiassutsit uuttorneqartalerneraniilli ukioq 2016 kiannerpaaffiusimavoq, ukiumilu tassani nittaalaqassuseq aamma qaffasinnerpaamiissimavoq.
/ritzau/