Svalbard naatsiiassanik toqqorsiveqalerpoq
Naatsiiassat nunarsuatsinneersut millionilikkaat ilisimatuunit paarilluarniarneqarput, siunissarlu eqqarsaatigalugu toqqortariniarneqarlutik.
Naatsiiassat issittumi toqqortarineqalereerput.
Nunat arabioqarfiusut TV-qarfissuat al-Jazeera taama ilanngutassiivoq.
Ajunaarnersuaqartoqarneratigut sorsuttoqarneratigulluunniit naatitat annaaneqassagaluarpata naatsiiassanut toqqorsiviliortoqarpoq, Svalbardimilu inissinneqarsimalluni.
Qaarsuup iluani tiffasissumi toqqorsiveqarpoq. Silap kissatsikkaluttuinnarnerata kingunerisaanik immap qaffakkaluttuinnarsinnaanissaa annilaanngatigineqarmat toqqorsivik tiffasissumi inissinneqarsimavoq.
Naatitat assigiinngitsut Iraqimi, Afghanistanimi, Rwandamilu sorsuttoqarneratigut annaaneqarnikuupput, naatsiiassallu Svalbardimi toqqortarineqarneratigut tammatsaalioniarneqarlutik. Naatsiiassat ukiuni 100-rujulikkaani taamatut toqqortarineqarsinnaapput.