Suppussaallutik ipisut
Takornarianut angallat ”Kisaq” aqqaneq marlunnik ilaasoqarluni sermersuup eqqaaniippoq, ualilluarneranilu tallimanut tanneq qulinngortoq ajunaarneq pivoq, Uummannami kriminalassistenti Karl Borup oqarpoq.
Takornariat angallataanni Kisami inuttaasut umiatsiamik pullattakkamik Sermersuup eqqaanut Kangerluarsummi takornarianik nunamukaassipput, takornariallu assiliisaqattaarnerini inuttaasut umiatsiami pullattakkami utaqqipput, taamaannerani isiginnittut ilaasa oqarneratuut, helikopterersuup qangattalersup nipaatut ittumik sermersuarmit qannguluttoqarpoq tassanngaannarlu sermip erngullu suna tamaat qaarlugu supivaat. Supineranilu takornariat tallimat nusunneqaannarlutillusooq qaarussaapput.
-Iluatsitsinerinnakkut takornariat pingasut nunamut qaqinneqaqqipput ajoraluartumilli marluk annaanneqanngitsoorput, Kriminalassistent Karl Borup oqarpoq.
-Sermersuup ernga supisoq sermitaqarpoq, maralluttaqarluni ujaraaqqanillu ersittoqarani Karl Borup oqarpoq.
Takornariat pingasut qaarussaanermit annaanneqartut angallammut Kisamut qaqinneqarput atisaallu taarserneqarlutik. Allalli qallunaat angutit marluk 70-inik 73-inillu ukioqartut annaanneqanngitsoorput. Imaq sermimik ujaraaqqanik marallummillu ersinngilaq, ipisup siulliup timaa sivikitsuinnaq qaangiuttoq nassaarineqarpoq, aappaatalu timaa akunnerpaaluit qaangiuttut supisimasup avatinnguani nassaarineqarluni qaqinneqarpoq. Ajunaartunut ilaqutaasut Danmarkimi najugaqartut pisumik ilisimatinneqareerput, ajunaartullu timaat Danmarkimukaanneqarumaarput.
