Sunngitsumik tiguaasoq taliatigut politiit aallaasariaqarsimavaat

Angutip inooqanni sakiaatigut savimmik kapoorniarlugu qunusaalermagu, politiit igittariaqarsimapput:

- Angut ulorianartorsiortitsilermat assaqquatigut politiip pigaartuusup aallaasariaqarsimavaa, politimester Steen Silberg Thomsen ilisimatitsivoq.

Angut kinguninngua tigusarineqarpoq, napparsimmaviliaanneqarlunilu, paarineqarlunilu misissorneqarpoq. Angut taanna Nuummi Dronning Ingridip napparsimmavissuanukaanneqassaaq, tassani misissoqqinneqassalluni.

Steen Silberg Thomsen Radioaviisimut ullumi oqarpoq, angut nammineq eqqartuussivimmiissinnaanngikkaluartoq, inatsit tunngaviusoq naapertorlugu killisiorneqassasoq, tigummigallagassangortinnissaa siunertaralugu.

Sunngitsumik tiguaaneq Ilulissani politiinit misissorneqassaaq.

- Qasigiannguani politiit namminneq misissuissappata naleqqutinngilaq, namminnermi pisumi akooreerput. Taamaammat Ilulissani politiit pisumik misissuissapput, Steen Silberg Thomsen Radioaviisimut oqarpoq.

Qasigiannguani politiip pigaartuusup aallaasersortariaqarsimanera politimesterip aamma misissuivigissavaa, inernerali qaqugu tusarliussinnaanerlugu oqarsinnaannginnerarpoq.

Tiguaanermi arnaq ajoquserneqarsimanersoq politimesterip oqaatigisinnaanngilaa, pisormi suli misissuivigineqarmat.