Sunngiffimmi aalisartup kapisillip nalunaaqutaa pinnassutigigaa
Sunngiffimmi aalisartoq tassaavoq nersutinik toqoraasoq soraarneq, taassumalu kapisillip nalunaaqutaa Pinngortitaleriffimmut nassiussimavaa. Kapisilik Akinnaani ssptembarimi 2015-imi pisaraa.
Kapisilik Sverigep kuuisa ilaanni Nissanimi 2014-imi nalunaaqutserneqarpoq.
Kristian Isbosethsen sunngiffimmini aalisartuuvoq misilittagartooq Qaqortullu kitaani 1970-ikkunnili kapisilinniartalersimalluni.
- Ukiut tamaasa kapisilinniartarpunga, nuliaralu ukioq naallugu nerilluartakkatsinnik, taakkulu perlukui atorluartaqaagut, naatsivitsinnut naggorissaatitut atorluarneqartarlutik, Kristian Isbosethsen oqaluttuarpoq.
Aalisarnermut Piniarnermullu Naalakkersuisoq Hans Enoksen NASCO-p, North Atlantic Salmon Conservation Organizationip akissarsiaritittagaanik tunniussisuuvoq.
NASCO tassaavoq kapisilinnik Atlantikup avannarpasissuaniittunik peqartuaannarnissaanik suliniaqatigiiffik, kapisileqatigiit qularnaatsumik aqutsinikkut piujuaannaqqullugit suliniaqatigiiffiusoq.
Suliniaqatigiiffiullu kajumissaarivoq kapisilinnik nalunaaqutalinnik siumugaqarsimasut taakku nassiuttassagaat, sumi qangalu pisaasimaneri ilanngullugit ilisimatitsissutigalugit. Taamaaliornikkut kapisillit nuuttarneri ilisimasaqarfiginerulerussammata.
Nunatsinni kinaluunniit nalunaaqutalimmik kapisilittoq, pisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.500 dollarsinik aningaasartalinnik akissarsitinneqartarluni.
