Sungiusarneq Malik :"Umiarsuaq Nuup umiarsualiviani tiguarneqarpoq "
Kilisaammi, umiarsuarmik tiguaasimasunik inuttaqarunartumi, putsumik aniasoqarujussuarnera upalungaarsimalluni piareersimanermut pissutaavoq.
Pisorli sungiusarnerinnaavoq – sungiusarneq taanna taaguuteqartinneqarpoq Malik 2008, Danmarkimi naalagaaffiup politiivi, Kalaallit Nunatsinni politiit, qatserisartut peqqinnissaqarfillu sungiusarnermi peqataapput.
Umiarsuarmik tiguaasoqarsimatillugu tiguakkanik tiguaasunillu politiit annaassiniarlutillu tiguaasunik tigusarinninniarnerat Nuup umiarsualiviani ingerlanneqarpoq. Umiarsuaq kilisaat ” Saattuaq” sungiusaatitut atorneqarpoq. Inuit 23 kilisaammi tiguarneqarsimasut annaanniarneqarput. Politiit peqqinnissaqarfimmiut Nuummilu qatserisartut sungiusarnermi peqataapput. Politiit arlallit aallaaserlutik umiarsualivimmit, umiarsuarmik tiguaasut tigusariniarpaat, tiguakkallu iperagaasinniarlugit. Højtalerit atorlugit umiarsuarmi issimasut anillaqquneqarput, ataasiakkaarlutillu niullutik. Tigusat umiarsuarmit niuneranni napparsimaveqarfimmiunit passunneqarput, ambulance-nillu aallarunneqarlutik. Sungiusarneq “Malik 2008” nalunaaquttap akunneri sisamat sinnilaarlugit Nuup umiarsualiviani ingerlanneqarpoq, umiuarsualivik nalinginnarnit ingerlavigeqqusaajunaarlugu.
