Arnat ulluat Sungiusarneq aamma arnaassutsimik takutitsivoq

Arnat uppatigissuussapput, arnat tuattuussapput, arnat qajannartuussapput aamma arnat pullaarissapput. 
Arnap timaanik isiginneriaaseq ukiorpassuarni taamaaginnavissimavoq.

KNR arnat ulluannut atatillugu sungiusartarfimmut Crossfit Inuamut pulaarput.

Crossfiternerulli silarsuaani pingaartitat allarluinnaapput. Qanoq isikkoqarnerit apeqqutaanngilaq, timivit sapinngisai apeqqutaapput. 

- Uanga arnaanerusutut misigisarpunga oqimaatsunik kivittaarisinnaagaangama. Nammineersinnaasutut misigisarama maani timersoraangama, timersuut sakkortooq crossfit atorlugu sungiusartartoq Nina Skydsbjerg Jacobsen oqarpoq.

Timip kusanassusianik isuma aalajangersimasoq peqqutigalugu ilaatigut timersoriartoqartarpoq. Kisianni crossfitimi timiginnerunissaq isikkorinnerunissarluunniit anguniarneqarneq ajortoq, Crossfit Inuami piginneqataasup erseqqissaatigaa.

- Crossfitertarnerup silarsuaani arnap timaanik isiginneriaaseq allaanerujussuuvoq. Timip sapinngisai pingaartinneqarnerupput, isikkoq pingaartinneqanngilaq. Isikkoq inuunermi piviusumi pingaartuunngilaq, piginneqataasoq, Lasse Nymand Petersen, oqarpoq.

Ullumi pingasunngornermi marsip ulluisa arfineq-pingajuat arnat nunani tamalaani sorsuutigisaminnut ulloraat. Naligiinnerulernissarlu Crossfit Inuami immikkut malunnartinneqanngilaq, naligiittuaannarpummi. 

- Ukiut, isikkoq, arnaaneq angutaanerluunniit, taakku apeqqutaanngillat, Nina Skydsbjerg Jacobsen oqarpoq.

Kalaallit 53-it nunarsuaq tamakkerlugu unammiuaarnermi Crossfit Games 2017-imi peqataapput. Kalaallit peqataasut affaat sinnerlugit arnaapput, tamannali nalaatsoornerinnaanngilaq, sakkortuumimmi sungiusartartut 
arnaanerupput.

- Arnarparpassuuvugut, angutertagut maani ikinnerussuteqarput. Kisianni tamanna soorlu soqutigineqarpallaanngitsoq, Nina Skydsbjerg Jacobsen oqarpoq.

Arnalli arnat sorsuutigisaminnut ulluminni sorsorusussusikinnerunngillat, sorsunnermi allatut aamma takutinneqartarpoq.

- Arnat sukataarsinnaanerupput, ajorsarnerliortuungillat, tamannalu torralluinnarpoq. Angutit tamatuminnga ilikkagaqarfigisinnaavaat, Crossfit Inuami piginneqataasoq, Lasse Nymand Petersen, KNR-imut oqarpoq.