Sungiusaasartoq: Ikiaroornartoq timersortartut akornanni annertuumik atugaavoq

Poorskikkunni Nuummi pissartanngorniuttoqarnerani AntiDoping Grønland pakasaalluni misissuimmat, nerrivimmi arsaarartartut nunanut allanut unammisartuat, Petrus Brønlund, ikiaroornartumik hashitorsimasoq nassaarfigineqarpoq.

- Ikiaroornartup haship timersortartut akornanni annertoorujussuarmik qangali atugaanera takornartaanngilaq.

Taama oqarpoq assammik arsarnermik ukiuni arlalinni sungiusaasatoq, maanna GSS-imi sungiusaasuusoq, Lars Dahl.

- Ilisimaaraarput tamanna qangali pisartoq, annertunerusumilli iliuuseqartoqarneq ajorpoq, aamma avammut saqqummiunneqarneq ajorpoq. Taamaattoqaraangat akornatsinni soorunami oqaluuserisarparput. Ikiaroornartoq inerteqqutaavoq, imaassinnaavorlu tamannarpiaq ussernartorsiortitsisartoq, Lars Dahl oqarpoq, nangillunilu:

- Taamaattoqaraangat kikkut pineqarnersut akornatsinni naluneq ajorparput, taakkulu klubbimiit ukiuni aalajangersimasuni anisitaagallarnissaat aalajangiunneqartarpoq.

Lars Dahl isumaqarpoq annertunerusumik misissuisoqartarnissaa pisariaqarluinnartoq, pingaartumik maanna kalaallit timersortartut nunarsuarmi unammersuartarnernut akuujartuinnarnerisa nalaanni.