Sundhedsplejerske: Naalungiarsuit hashimik atuisunik angajoqqaaqartut

Angajoqqaat meerartaaqqammersut ikiaroornartumik hash-imik atornerluisut peqqissaasup meeraaqqanik sullissisup Jaaraq Olsenip ulluinnarni sulinermini naammattoortarpai. Anaananngorlaat ikiaroornartumik hashimik atuisut amerliartornerannik SANA-mi ernisarfimmi malugineqartoq, Jâraq Olsenip aamma maluginiarpaa.

Radioaviisimi ippassaq unnukkut oqaluttuaraarput, qaammatini kingullerni marlunni Dronning Ingridip napparsimavissuani inunngortut 15 procentii ikiaroornartumik hash-imik atuisunik anaanaqartut.

Peqqissaasoq meeraaqqanik sullitaqartoq Jâraq  Olsen suliniummi Ilaqutariinnut meerartaartussanut piaartumik iliuuseqarnermut ilaatilllugu ilaqutariinut takuniaasarpoq, aamma meerartaarnerup kingorna.

Siusinaarluni iliuuseqarnermi suliniummut atatillugu ilaqutariit 50-it sullinneqarput.

Ilaqutariit takuniarneqartartut ilaat ikiaroornartumik hash-imik atuisuupput taakkua amerliartortut Jaaraq Olsenip  maluginiarpaa.

- Ilumoorpoq tamanna, meeraaraatitaartartut ikiaroornartutortartut  amerlisimapput, Jaaraq Olsen oqarpoq.

Naalungiarsummut kingunerisartagai tassanerarpai:

- Meeraaqqat sajukulaarnerat sakkortunerusarlunilu eqqissisimannginnerusarput, eqqissisimannginnerat sivisunerusarluni, qianerallu pisarnermit allaanerusarluni, Jâraq Olsen oqarpoq.

Jâraq Olsen meerartaaqqammersunut pulaartarnermini ilaqutariit  malinnaafigissarpai siunnersortarlugillu. Angajoqqaanngorlaat ilai ikiaroornartup haship ulorianaatai pillugit tusaaniarneq ajorput.

- Angajoqqaat ikiaroornartumik hash-imik atuisut namminneq pisariaqartitatik eqqarsaatiginerusarpaat, naalungiarsuup pisariaqartai eqqarsaatigivallaarnagit, Jâraq Olsen oqarpoq.

- Angajoqqaanngorlaat ikiaroornartumik hashinik atuisuunerat pissutaalluni nalungiarsummut soqutigisaqarneq ajorput, taamaattumillu naalungiarsuit avatangiiserisaminut attaveqarniarnera innarlerneqartarluni, Jâraq Olsen oqarpoq

- Peqqissaasutut meeraaqqanik sullissisuulluni ilaanni oqimaattarpoq unamminarlunilu. Ikiuukkusukkaluarluni ilaqutaanngikkaangat soriarsinnaanngitsutut misigisimanartarluni ilaannikkut meeraq sullineqartoq angerlaakkusunnartarluni, Jâraq Olsen oqarpoq.

Suliniummi  nuna tamakkerlugu ingerlanneqartumi ”Ilaqutariinnut meerartaartussanut piaartumik iliuuseqarneq”-mi ilaqutariit 300-it missaannik amerlassuseqartut sullinneqarput.

Suliniut taanna Inuuneriitap suliaanut ilaavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl