Sumiluunniit imerajuttoqartillugu meeqqat nanertorneqaatigisarpaat

Taama oqarpoq qallunaaq tarnit pissusiinik ilisimasalik Birgit Trembacz, ilaqutariinni imigassamik ajornartorsiuteqartarneq pillugu arlalinnik atuakkiaqartoq.

- Meeqqat imminut pisuusutut misigisimasarput isumaqalertarlutillu nammineq kukkussuteqartuullutik, ajornartorsiutillu qaangerneqarnissaanut akisussaasutut misigisimasarlutik – aamma avinnermi taamatorpiaq pisoqartarpoq, Birgit Trembacz Danmarkip Radiuanut oqarpoq.

Taassuma ilanngullugu oqaatigaa, meeqqat inuunerminni misigisatik nuanninngitsut isertuuttaraat, tamanna ataatap anaanalluunniit nuanniilliuutiginnginniassammassuk.

Birgit Trembacz isumaqarpoq, meeqqat atornerluinermut pisuunnginnerannik oqaluttuunnissaannut angajoqqaat angisuumik akisussaaffeqartut.

- Meeqqammi oqaluttuunneqanngikkunik ajornartorsiut inersimasunngornerminni qimakkuminaatsissavaat, Birgit Trembacz nassuiaavoq.

- Meeqqat tamakkua affaasa tamanna ajunngitsumik qaangertarpaat. Sinnerili tarnikkut ajornartorsiulersinnaasarput, isummakkut nanertisimalerlutik, annilaangasalerlutik imminullu tatigiunnaarlutik, Birgit Trembacz Danmarkip Radiuanut oqarpoq.