Sumiissusersiutit takornarissanut attartortinneqartariaqaraluarput
Norgimiut pingasut Kangerlussuup eqqaani tammaaneqartut eqqarsaatigalugit takornarialerisartut arlallit taama isumaqarput.
Nunatsinni Takornariaqarnermi Inuussutissarsiornermilu Siunnersuisoqatigiinni pisortaanerup Anders Stenbakkenip norgimiut tammaaneqartut ujaarineqarnerannut atatillugu siunnersuutigaa takornariat sumiissusersiutinik oqarasuaatinillu attartorsinnaasariaqartut:
- Takornariat aqqutissartik nalulersimagunikku taamaaliorlutik kalerrissinnaanngussavaatsigut, sumiissusersineqarsinnaassallutillu. Ullorpassuit ujaarisariaqassanngikkaluarpavut nukissanik aningaasarpassuarnillu sipaarsinnaassagaluarluta, Anders Stenbakken oqarpoq.
World of Greenland Arctic Circle-imi pisortaq Christian Frimodt-Møller isumaqataavoq:
- Isumaqataalluinnarpunga, aamma inuit amerlasuut apeqqutigisarpaat tamakkuninnga attartortoqarsinnaanersoq. Takornariat asimukarniartut aamma oqarfigisarpavut tamakkuninnga atorfissaqartitsisarsinnaasartut. Taamaammat isumaqarluinnarpunga tamakkuninnga attartorsinnaasariaqartut, Christian Frimodt-Møller oqarpoq.
Sumiissusersiutinik oqarasuaatinillu attartortitsisarsinnaalernissartik taassuma maanna eqqarsaatersuutigilerpaa, soorlu Tunumi takornariaqartitsinermik suliallit tamanna neqeroorutigisarnikuugaat.
Destination East Greenland atortunik tamakkuninnga takornarianut attartortitsisarnikuupput, takornariallu periarfissaq tamanna atorluarsimagaat Anders Stenbakkenip oqaatigaa.
Takornariat Kalaallit Nunaannukartartut asimukartartullu qassiunersut ilisimaneqanngilaq, Christian Frimodt-Møllerilli oqaatigaa Kangerlussuarmiit asimukartartut amerlaqisut:
- Takornariat amerlasuut Kangerlussuarmiit asimukartarput, Kangerlussualiarnermi nunaqarfinnut allanut sanilliullugu akikinneruvoq, taamaammat Kangerlussuarmiit Sisimiut tungaannut pisuinnarluni takornariarneq nuannarineqartorujussuuvoq, Christian Frimodt-Møller oqarpoq, takornariallu qulimiguulimmik aaneqartariaqartartut takussaajuaannarnerarpai. Qulimiguullit atorlugit takornarianik aallertariaqartarneq inuiaqatigiinnut akisusarnerat eqqarsaatigalugu takornariat sumiissusersiutinik qaammataasallu atorlugit oqarasuaatinik attartorsinnaanissaat takornariaqartitsinermik suliallit siunnersuutigaat.
