Nunatsinni innuttaaqataasut qanoq ilillutik oqartussaaqataasutut misigitinneqassappat, aamma qanoq ililluni tamanna kommunit aaqqissuussaanerannik iluarsaaqqinnermi 2009-mi aallartittussami isumannaarneqarsinnaava?
Apeqqutit taakku Kommuneqarfiit Kattuffiata KANUKOKA-p allaffissornikkut aqutsisoqatigiivinit oqallisissiatut Aaqqissuussaaneq-mik taallugu saqqummersittakkami ippassaq saqqummerput.
Kommunit 18-iusut sisamaannanngorneranni illoqarfinni nunaqarfinnilu innutaasut tamarmik oqartussaaqataanerat isumannaarusunneqarpoq. Tassanilu sumiiffinni sinniisut pilersinneqarnissaat aqqutissaasoq, allaffissornikkut aqutsisoqatigiit siunnersuutigaat.
Assersuutigalugu kommuninik aaqqissuuseqqinnermi nunaqarfinni aqutsisoqarneq atorunnaarsinniarneqarpoq, tamannalu nunaqarfimmiut ataatsimeersuarneranni 2006-imi pisumi ernumanartutut taakkartorneqarpoq. Ernumassutit illoqarfinni ataasiakkaani aamma tusarliunneqartaannarput, innuttaasummi oqartussaaqataarusupput.
KANUKOKA-mit isumaqartoqarpoq, sumiiffinni sinniisoqatigiinnik pilersitsineq aqqutissaasoq.
Siunnersuutigineqarpoq sinniisut nunaqarfinni aqutsisut ullumi sulinerattulli sulissasut, soorluttaaq, assersuutigalugu Nuup ilaani Qinngorput-mi imaluunniit Qasigiannguani sinniisunik, najukkaminni apeqqutinik pingaartitaminnik saqqummiisartussanik pilersitsisoqarsinnaassasoq.
Apeqqutaalerporli sumiiffinni sinniisut oqartussaaffii qanoq aalajangersarneqassanersut, kommunalbestyrelsellu aalajangiiniartarnerini susassaqarfitik pillugit sumiiffinni sinniisut qanoq tusarniaaffigineqartassanersut.
Aamma sinniisussat qanoq qinerneqartassapput, toqqaannartumik qinersinikkut imaluunniit peqatigiiffiit kattuffiillu ilaasortassanik toqqaanerisigut?
Apeqqutit taakku inatsisartut marlunngorpat ataatsimiinnerminni Sumiiffinni sinniisoqarnissamut apeqqut siullermeerlugu oqaluuserilerpassuk akineqarsinnaajumaarput.
