Sumiginnakkat eqqumiitsuliornikkut iluaquserneqarput

Titartakkat qalipaatigissaartut Nuuk Kunstmuseumimi takussaapput saqqummersitsineq 'Iluliaaraq' ammarneqarmat. Meeqqat naalugiarsunniit 18-it tikillugit ukiullit sianiutit atorluarlugit sanasimavaat qalipakkat qiperukkallu Nuuk Kunstmuseumimi takusaasut qimerluuataarsinnaasaat.

- Upperaara meeqqat siunissami nukiujumaartut saqqummersitsinermilu uppernarsivarput isumalluarnissamut pissutissaqarluartugut. Meeqqat arlallit atugarliorlugik alliartorsimapput maannalu saqqummersitseqataanikkut nalilittut imminnut isiginerat qaffariassaaq. Allatigut ilaquttat kisimik eqqumiitsulianik qimerluuisarput maannali kikkulluunniit takusaasinnaanngorlugit saqqummersitsivugut meeqqat pilersitaat kikkunnit tamanit takuneqarsinnaanngorlugit, Susanne Jensen oqarpoq saqqummersitassat nivinngaassortillugit.

Sammisat ilagaat Noap qajaa tassani meeqqat uumasunik aappariiaanik sanasimapput skuut atorunnaakkat atorlugit. Illut meeqqat taamungaannaq titartagaat eqqumiitsuliortullu kingorna nangissimasaat aamma nivingapput eqqumiitsuliat nutaaliaanerusut sanianni.

- Ukiut arlallit ingerlanernanni Billedskolen tunulequtaralugu inerisaasimavugut, assorujussuarlu nuannaarutigaarput saqqummersitsineq katersugaasivimmi matumani nuannersumi pisinnaammat. Meeqqat timertik tamaat atorlugu sulisimapput qularutiginngilaralu killissatik annertusiallassimassagaat eqqumiitsuliorneq aqqutigalugu. Tamanna inuunermi misigisanik pitsaasunik nuanniitsunillu aniatitsivittut atorsinnaavaat, Susanne Jensen oqarpoq.

Meeqqat suliatik tulluusimaarutigaat tarneqarfigalugit suliarisimagamikkit. Meeqqat ilaat ataasiinnarmik sanasimapput ilaat arlalinnik sanaaqartut.

- Sulit pingasut uanga suliaraakka taakkulu uani teqeqqumi nivingapput. Nuannaarutigaara suliavut inunnit takusarneqarsinnaammata, Minik oqarpoq sisamanngorneq maajip sisamaat nalunaaqutaq sisamanut takusaasut siulliit isertinnagit.

Saqqummersitsineq uani annerusumik atuarsinnaavat: http://iluliaq.gl/hvorfor-kunstterapi