Sume Nuummut piareerput

Nipilersoqatigiit nuannarineqarluartut Sume unnugu kulturip illorsuani Katuami tusarnaartitsiniarput billetillu tunisaallualereerput.
Allattoq Noah Mølgaard
decembarip 02-at 2011 12:19

Ukiut qulikkaat sisamat Sume-kkut nipilersoqatigiittareerput sulilu nuannaritsitik aanaakkunniit inuusuttuaqqanut nuannisartittaqalugit.

Tusarnaariat siorna decembarimi Sume-kkut Katuami tusarnaartitsinerat eqqaamalluarpaat siorna tusarnaartitsinerit pikkunarnersaasa ilaattut, maannalu torrallaaqqinnissamut piareerput.

Sume-kkut nuusiaat siulleq "Sumut" 1973-mi saqqummerpoq. Taassuma malitsigai "Inuit Nunaat" aamma "Sume".

Ukiut arlallit avissaarsimareerlutik 1994-mi immiusseqatigeeqqipput "Persersumi" immiunneqarmat. Maanna nipilersoqatigiit ilaatigut ernutsiulersimasut appeqqinnissaminnut piareerput.

- Erinnat 28-30-it apperiaannaatigaavut, Sume-kkunniit Malik Høegh KNR-imut oqarpoq.

Sapaatip akunnera sinnilaarlugu sungiusaqatigeereerlutik unnugu Katuami tusarnaartitsinissamut piareerput. Ullup qeqqata qaangilaarnerani billetit 400-ut tungaannut tunineqareersimapput Katuamiillu naatsorsuutigaat ualimut inuit soraakaappata billetinik tuniniaaneq suli ingerlalluarnerulissasoq.

- Erinnat tamatta ataasiakkaarluta atorsinnaagaluarpagut, kisianni nipilersoqatigiittut immitsinnut nassaareqqinnissarput piffissartorfiginerusarparput, Malik Høegh oqarpoq.

Nipilersoqatigiit tassaapput: Malik Høegh, Per Berthelsen, Emil Larsen, Hans Fleischer, Hjalmar Dahl, Sakio Nielsen, Lars Frederik Olsen og Titken Jakobsen.

Aamma atuaruk