Sume - Mumisitsinerup nipaa Koreami

Koreami tv-qarfiup EBS-ip ukiumoortumik piviusulersaarutinik filmfestivalertitsinerani filmi piviusulersaarut, Sume - mumisitsinerup nipaa, takutinneqartunut ilaassaaq, taamaalillunilu Korea Kujallermi tamanit tv-kkut isiginnaarneqarsinnaassalluni.

Filmip ingerlatsisua Emile Hertling Péronard, ilitsersuisoq Inuk Silis Høegh peqatigalugu maanna filmi takutikkiartorlugu Seoulimiittoq taama nalunaarpoq.

Kalaallit filmiliortartut taakku ippassaq Korea Kujalliup illoqarfiisa pingaarnersaanni, Seoulimi oqaluttuarisaanermut tunngasunik katersugaasivimmi filmi pillugu nalunaaquttap akunneri marluk atorlugit oqaluttuarlutik saqqummiipput.

Inuk Silis Høegh Emile Hertling Péronardilu oqaluttuarnerminni kalaallit smalfilmiliaannik asseqanngitsumik nassaarsimanertik oqaluttuaraat, taakkuninnga filmilianik nassaarneq filmip piviusunngorsinnaaneranik qulakkeeripput filmilianillu katersaasivimmik "Inuiaat Isaat"-nik saqqummersitsinermut pissutaallutik, "Inuiaat Isaat" Koreami aamma saqqummiunneqarpoq.

Saqqummiinerup kingorna isiginnaartut appeqquteqaqattaarput, ilaatigut kalaallit ullutsinni qanoq imminnut kinaassutsiminnik saqqummersitsisarnerat apeqqutigineqarluni.

- Kalaallit oqaluttuarisaanerat arlaqartut ilisarnartoqartippaat, Koreami Japanimit nunasiaataanikuuvoq kingornalu Koreamiut imminneq Koreamiusut kinaassusertik ujartornikuullugu, Emile Hertling Péronard allappoq.

Filmi unnugu festivalertunut filmertarfimmi Miro Spacemi takutinneqassaaq, kingornalu Korea Kujallermi tv-kkut isiginnaartartut tamarmik tv-qarfimmit EBS-imit aallakaatinneqarnerani isiginnaarsinnaassavaat.

Festivali sapatriuppat akissarsisitsinermik naggaserneqassaaq.