Sulorartartut kultinnanniassamaalerput
Siunissamut piukkunnaateqarluartoq Nuka Mark Nielsen Narsameersoq Arctic Winter Gamesimut peqataasussat akornanniippoq.
Sulorartartut kattuffiat akissaqanngilaq toqqaanissaq sioqqullugu sungiusartitsinissamut. Narsarmiut Nuummi illoqarfimmi pissartanngorniuttoqarneranut peqataapput taamalu ketcheri arsaararlu suluttali atorlugu piginnaasatik takutillugit.
13-nik ukiulik Nuka Mark Nielsen qalusisarlunilu smashereqattaarpoq U-17-ni aamma U-19-ni unammeqataanermini. Tamannalu tassa naammassimavoq Whitehorsemi Arctic Winter Gameseriaqataasussatut toqqagaanissaanut.
Arctic Winter Gameseqartarnerani kalaallit sulorarnermi ujamminik pissarsilluartarput aammalu 2012-mi unammersuartoqarnissaani taama pisoqaqqerataannaavoq.
- Anguniarparput ujaminnannissaq ajornanngippallu ujammit akimanerit pissarsiarerusullugit. Taassuma saniatigut Arctic Winter Games isigisarpara inerisaatigaluni unammisarfittut inersimasuni unammisartunngorumaartussat tassani misilittakkanik katersisarmata. Tassani aamma ullut arlallit sulorartartuutivut unammisut malinnaaffigisinnaasarpavut tamannalu naleqartorujussuuvoq, nuna tamakkerlugu sungiusaasoq Bjarne Nielsen oqarpoq.
Unammisartut soorlu Sara Lindskov Jacobsen Nuummeersoq aamma Iidui Broberg Qeqertarsuarmeersoq Arctic Winter Gameseqataaqqissimasinnaagaluarput immaqalu aamma arlalinnik ujamminnallutik. Taakkuli maanna inersimasuni nunanut allanut unammisartuniilereernikuupput. Unammersuarneq Whitehorsemi Yukonimi martsip sisamaat aallartittussaq atorneqassaaq inuusunnerit siunissami unammisartuusinnaanersut nalilersornerinut.
- Arctic Winter Gamesimi peqataasussat ilaat ilimanarpoq 2015-mi Island Gamesimi Kalaallit Nunaat sinnerlugu ujaminnassinnaajumaartut, Bjarne Nielsen oqarpoq.
Aajuku Arctic Winter Gamesimut peqataasussat.
U-16
Arnarissoq Møller, SPQ
Ineqi Sakariassen, ARS
Nuka Mark Nielsen, ARS
Thomas Madsen, B-67
Taartissamaatit:
Olina Kristiansen, SPQ
Martin Sikemsen, ARS
U-19
Nina Høegh Møller, TEN
Hansigne Broberg, SPQ
Nikki Nathansen, TEN
Dennis Hansen, SAK
Taartissamaatit:
Asta Helms, B-67
Nick Ø. Jacobsen, B-76
