Sulorartartut isumalluarput
Kingullermik Island Games-eqarmat kalaallit ujaminnattaavinit arfineq pingasuusunit sulorartartut arfinillit pissarsiaraat.Taamanikkut Frederik Elsner angutit ataasiakkaarneranni pissartanngorpoq, taannali peqataaniarani ukiormanna nalunaarpoq.
Taamatuttaaq arnat ataasiakkaarneranni kingullermik sølvinnattoq Mille Kongstad peqataanianngilaq. Taamaakkaluartoq isumalluartoqarpoq.
- Kingullermik Ålandimi unammeqataanermi angusarissaarpugut holdikkaarnermi sølvinnalluta ataasiakkaarnermilu arlalinnik angusaqarluta. Ajoraluartumik Mille Kongstad peqataasussaajunnaarpoq, unammisartulli allat toqqarneqartut piareersimapput sapinngisartik tamaat sukataarnissamut. Isumalluarpugut aallartinnatalu sungiusarluarnissarput taamaallaat amigaataavoq, nuna tamakkerlugu sungiusaasoq Bjarne Nielsen oqarpoq.
Nunatsinneersullu ujamminnattussatut isumalluarfiginerpaasaattut taaneqarsinnaasoq Bror Madsen mianersoqqusivoq isumalluarpallaarnissamut.
- Kingullermut sanilliullugu sungiusarluarneruvunga unammisarnerilli amigaatigalugit. Suli nalunarpoq qanoq pisoqarnissaa inuusuttut ilaatigut tupaallatsitseriataartaramik, Bror Madsen oqarpoq.
Taanna kalaallini siullersaalluni Island Games-eqarnerani angutit ataasiakkaarneranni 2005-imi Shetlandip qeqertaani unammersuartoqarmat pissartanngorpoq.
Sulorarnermi unammersuarnerit Island Gamesimi aallartissapput sapaat juunip 26-at naggaserneqassallutillu ujamminanniunnerit juulip aallaqqaataani ingerlanneqalermata.
Sulorarnermi nunanut allanut unammisartut tassaapput: Bror Madsen, Taatsi Pedersen, Jens Frederik Nielsen, Mininnguaq Kleist, Sara Lindskov Jacobsen, Hedvig Broberg, Susanne Walbom aamma Anja Skov Kjeldsen.
