Sulorarneq: Pikkorissut peqataaniarunnaarput
Arnat ataasiakkaarlutik unammineranni qanorluunniit pisoqarsinnaalerpoq siorna pissartaq Mille Kongstad Qaqortumeersoq peqataasussaajunnaarmat. Siorna finalemi unammisaa Aviaaja Geisler aamma peqataassanngilaq Danmarkimi ilinniarnini pissutigalugu.
- Imaassinnaalluarpoq inuusuttut soorlu Sara Lindskov Jakobsen Nuummeersoq aamma Hedvig Broberg Qeqertarsuarmeersoq finalemut anngunnissamut periarfissaqalersut, sulorartartut kattuffianni siulittaasoq Michael Kleist KNRimut taama oqarpoq.
Taaneqartut taakku inuusuttuni unammisartuugaluarput, nunali tamakkerlugu sungiusaasup Bjarne Nielsenip kissaatigisimavaa inersimasunut nunatsinniittunut sanilliullutik sumut killissimanersut ineriartornerminni
Bror Madsen aamma finalemut anngutissangatinneqarsimagaluarpoq unammisussaasimassagaluaraluarlugu Frederik Elsner. Bror Madsen peqataasussaajunnaarmat inuusuttut periarfissaqalersinnaapput.
- Ilimanarsinnaalluarpoq inuusuttut soorlu Jens Frederik Nielsen aamma Taatsi Pedersen Nuummeersut finalemut annguttut. Ataguli takoriartigu, Michael Kleist taama oqarpoq.
Bror Madsen siorna pingasoriarluni finalerpoq, arnat angutillu akuleriillutik iligiiaarneranni Juliane Brønlund pissartanngoqatigalugu. Siorna angutit iligiiaarneranni pissartanngorput Frederik Elsner og Mininnguaq Kleist Nuummeersut, Frederik Elsner angutit ataasiakkaarneranni pissartanngorluni.
