Sullualummi angalaniarneq ulorianartoq
Maanna ajornannginnerusumik angallammik Sullualukkoortoqarsinnaalermat, angallatit nalinginnaat amerlaqisut imaatigut aqqut taanna misiliillutik aqqutiginiarsarisarpaat. Umiarsuit sinerissamik nakkutilliisunut nalunaartussaanerannik malittarisassaqarpoq, kisianni malittarisassat taakkua angallatinut minnerusunut, sumulluunniit angalaarsinaasunut atuutinngillat.
Angallatillumi tamakku taamaaliortarput. Ikittunnguit sinerissamik nakkutilliisunut nalunaartarput, ilarpassuili nalunaaratik angalaaginnartarput. Taamaattorli naak Sullualuk sikoqannginneruleraluarluni suli immakkut angallaviuvoq navianaatilerujussuaq, tassami anori silalu minutsialunnguit ingerlaneranni allanngoriataarsinnaasarmat.
Jean-Pierre Lehnert, sinerissamik nakkutilliisuneersoq, umiarsuarnik Sullualukkoortunik nakkutilliisuusoq, CBC Radiumut oqarpoq, angallatit piareersarluarsimanerullutik aqqutiminnilu qanoq pisoqarsinnaaneranut piareersimanerunissaat neriuutigigini. Tassami aqqutissaat kuussuartut aqqutigiuminartut inngimmat.
Taassuma ilanngullugu oqaluttuaraa, siorna aasakkut angallat 12 meterinik takissusilik sikut akornanni ingerlariaqqissinnaajunnaarami ajunaalernerminik kalerrisaarimmat, sikunillu aserorterummit piaartumik orninneqarnissaminik piumasaqarluni. Kisianni taama pisoqarsinnaanngilaq, Jean-Pierre Lehnert oqarpoq, tassami sikunik aserorterut qaninnerpaaq sivikinnerpaamik ullut marluk qaangiunneranni aatsaat apuussinnaammat, taamaattumik radiukkut ilitsersuinnartariaqarpavut. Qujanartumik sikut allamut nikimmata kaanngarpoq sikunillu kiggigunneqarnermigut sequminneqarani.
Aasaq manna tamatumunnga assingusunik amerlanerusunik pisoqarnissaa, taassuma naatsorsuutigaa. Angallatit minnerusut sinnerissamik nakkutilliisunut nalunaarneq ajorput, nittartakkakkulli quppernermikkut sumunnarnertik nalunaarutigisarpaat, ikinngutitik ilaquttatillu taamaalillutik malinnaasinnaaniassammata. Tamannali naammanngilaq, tamakkumi uagut ilisimasaqarfiginnginnatsigik, Lehnert oqarpoq.
Angallatit umiarsuillu 30-t missaasa Sullualuk aasarmanna aqqutiginiarsarissagaat ilimagineqarpoq.
