Sullualukkut angallattoqartalernissaa ilimaginngilaat
Beringip Imartaatigut angalasinnaalernissamut isumalluarpallaartoqarnera umiarsuaatilinnut ajoqutaariaannaasoq, Mærsk Line Limitedimi pisortaanerit ilaat, Stephen Carmel, Alaskami ulluni makkunani isumasioqatigiittoqarnerani peqataasoq, aviisimut Alaska Dispacthimut oqarpoq.
Beringip Imartaa piffissami qanittumi angallavigineqalernavianngitsoq Carmel isumaqarpoq.
- Piffissamik atuineq assartuussinermi pingaaruteqarluinnartuuvoq, Issittup sikuanik putsumillu pissuteqartumik kinguaattoornernut piffissaqartoqarani, tassalu tamakkorpiaapput Issittumi naammattoorneqarsinnaasut, Carmel oqarpoq.
Qaqugu Beringip Imartaatigoortoqartalersinnanera siumungaaq oqaatigineqarsinnaanngitsoq, Carmel oqarpoq , nangillunilu:
- Tamaanaqquuttoqartalernavianngilaq.
Taamaattorli Issittumi angallanerulernissaq Carmelip ilimaginerarpaa, tassa nunat issittut ornigarneqarnerulernissaat siulittuutigigamiuk, tamannalu pissasoq uuliamik gassimillu nassaartoqarpat.
- Nunarsuarmi silap kiatsikkiartornera ima sukkatigisumik pinngilaq allaat Alaskap Sibiriallu imartaatigut piffissami qanittumi angallattoqalersinnaalluni, Carmel oqarpoq.
