Sullualuk sullugineqarpoq

Sikuernerata kingorna Sullualukkut umiarsuit angallannerulernerannik kinguneqanngilaq, Canadamiut misissuinerisa tamanna takutippaat.

- Sullualuk Panamami sullualuttut ilinngisaannassaaq, Frederic Lasserre Quebecip Laval University-tianeersoq isumaqarpoq.

Umiarsuaatileqatigiit 124-it Asiameersut, Europameersut Amerikallu avannaaneersut attavigisimavai suliffeqarfinnillu 34-nik suliassaqarfimmi tassani sullissisut 2008-mi 62 procentii akissuteqarsimapput. Aperineqartunit taamaallaat aqqanillit Sullualukkoornissartik soqutigaat. Amerlanerit tamaani assartuussisooreerput, Canadian Press allappoq.

Issittumi siku aalermat amerlasoorpassuit isumaqaraluarput Sullualukkoortarnissaq kujasissukkoornerminngaanniit akikinnerungaassasoq.

Lasserre-p siorna misissuinera tassunga aamma assinguvoq. Misissuinerup taassuma takutippaa containerinik assartuisartut Sullualukkoornissartik akerlerigaat.

- Immap sikua naatsorsoruminaatsuuvoq, qaqugu sikuissanersoq qaqugulu sikussanersoq oqaatigiuminaattarpoq. Suliffeqarfiit taakku assartuussisuinnaanngillat, aammali piffissaq eqqorlugu sulisuullutik. Taakku ullualunnguanik kinguaattooraangamik annertuumik akiligassinneqartarput, Lasserre oqarpoq.

Issittumi umiarsuit angalasinnaasut sanaartornissaat aamma akisuneruvoq umiarsuarnullu allanut sanilliullugu orsussamik atuinerusarput. Taamaattumik Issittukkut sivikinnermik angallannerup sipaarutissarisinnaasaralui akissaatinik tamakkuninnga nungunneqartarput, Lasserre allappoq.

Misissuinerup inerneri Issittumi Siunnersuisoqatigiinnut Nato-mullu saqqummiunneqareernikuupput.