Sullualuk pillugu isumaqatigai
Sullualummik piginnittussaanerminut Canadap oqariartuutigiuarsimasaa USA-mit akerlilertuarneqartaraluartoq, USA-p Canadamut aallartitarisimasaannit Paul Cellucci-mit tapersersorneqalerpoq:
- Peqqarniisaarniartarnerit akulikilligaluttuinnartillugit isumannaalisaaniarnissaq eqqarsaatiginerusariaqarparput, isumaqarpungalu Canadamiut tapersersorneqartariaqartut, Paul Cellucci tv-qarfimmut CTV-mut oqarpoq, nangillunilu:
- Umiarsuit sakkussianik ajoquseerujussuarsinnaasunik usillit Amerikap nunavittaanukarniarsarisut taamaaliornikkut unitsinneqarsinnaalissapput. Sullualuk pillugu USA-p isummernera eqqarsaatigeqqinneqartariaqarpoq, neriuppungalu Canada tapersersorneqalissasoq, Paul Cellucci oqarpoq.
Cellucci aatsaat oqaaseqalinngilaq. Issittumi 2004-mi angalaarnermini tamanna oqaatigereerpaa, siornalu kingumut taama oqariartuuteqarluni.
Canadap ministeriunera Stephen Harper, USA-llu præsidentia George W. Bush kiisalu Mexicop præsidentia Felipe Calderón Quebec-imi Montebello-mi ullumi ataatsimiilissapput, Sullualuullu sammineqarnissaa pilersaarutaanngikkaluartoq, sammineqaratarsinnaanissaa ilimanarsinnaasoq, Canadami atorfilik aterminik taaserusunngitsoq oqarpoq:
- USA-p aallartitarisimasaa ministeriunermik Stephen Harperimik isumaqatiginnissappat isumalluarnartoqarpoq, atorfilik nittartakkatigut nutaarsiassalerivimmut thestar.com-imut oqarpoq.
