Sullualuk assortuussutigilerpaat

Amerikap nunavittaa avannaqqullugu imaatigut aqqut Sullualummik aamma taaneqartartoq nunarsuarmi nunat pisaanilissuit USA-p Canadap Ruslandillu akornanni assortuussutinngoqqajaavoq.

Tartupaluk Sullualummut qanikkaluartoq, assortuunnermut danskit ilanngukkusunngitsut nunanut allanut ministeriaqarfik ilisimatitsivoq.

Canadamiut isumaqarput Sullualuk Canadamut atasoq, sakkutuut umiarsuaannik Sullualummut aallartitsiniartut nalunaarutigineqarpoq.

Amerikamiut isumaqarput Sullualuk nunat tamalaat oqartussaaffigisariaqaraat taamaattumillu Canadamiut kukkusut. Tamanna pillugu amerikamiut sakkutuut umiarsuaannik Sullualummukartitsinialerput.

Taamalilluni Sullualuk pinnaassutaalerunarpoq.

Kisianni sooruna Sullualuk taama pinnaassutaalersoq? Sikorsuarnik ulikkaarpoq aqqutissaarpiaranilu.

Akissutissat makuugunarput, silaannaap kissakkiartornera, siku aappat imaatigut aqqutissaq nutaaq, aningaasat, uulia avatangiisillu.

Sullualummi siku aassappat, 4000 kilometerit aqqutigalugit kangianukartarneq oqaluttuaannanngorsinnaavoq, tassami Sullualukkut pisariinnerusumik kangianukartoqarsinnaalissaaq imaluunniit kitaanukartoqarsinnaalissalluni.

Umiarsuarsuit Sullualukkoortalissappata imaatigut assartuineq akikinneralaarsuanngussaaq.

Aamma oqaatigineqartarpoq nunarsuarmi ikummatissat uuliap gassillu 25 procentiat avannaarsuata naqqaniittoq.

Tartupalummik Sullualuup paavaniittumik piginnittussaaneq suli aaqqinneqanngitsorluunniit Sullualuk pillugu saqitsaannermut danskit akulikkusunngillat.

- Ajornartorsiut annertuvoq, nunalli allat umiarsuarnik qanoq pilersornerannut danskit akuliukkunnanngillat, kiisalu amerikamiut canadamiullu Sullualuk pillugu saqitsaatilernerata Tartupalummut sunniuteqarnissaa naatsorsuutiginngilarput, Tartupalummut tunngasut danskit canadamiullu suleqatigiilluarlutik aqqinniarmatigik, nunanut allanut ministeriaqarfimmi atorfilik kinaasutsimnik saqqummiussiumanngitsoq oqarpoq.