Sullualuk aaqqiagiinngissutaavoq
Sullualuup kikkunnit aqqutigineqarsinnaanera USA-p Canadallu akornanni, piffissami sivitsortumi aaqqiagiinngissutaavoq. USA isumaqarpoq, Sullualuk nunat tamalaat imartaannut ilaasoq, taamaammallu Canada ilisimateqqaanngikkaluarlugu Sullualuk aqqutigisinnaagitsik. Tamatuma akerlianik Canadamiut isumaqarput Sullualuk Canadap imartarigaa, taamalu oqartussaaffigalugu.
Nunat taakku marluk Sullualummik soqutiginninnerat sakkortusigaluttuinnarpoq, tassami silap pissusaata allanngoriartornera pissutigalugu Sullualuup aqqutigineqarsinnaanera ajornannginneruleraluttuinnarmat. Tamatuma kinguneranik takornariartitsineq nutaanik periarfissaqalerpoq, umiarsuarnik assartuutinik aqqutigineqarsinnaalerluni pisuussutinillu atuinermik ineriartortitsisoqarsinnaalluni.
Amerikamiut sakkutuuisa imarsiortut Amerikamiut nunani issittuni aningaasarpassuarnik aningaasaliinissaat ukiarmi nalunaarusiamminni innersuussutigaat, taamaaliornikkummi Amerikamiut aningaasarsiornikkut isumannaatsuunissamullu soqutigisaat illersorneqassammata.
Don Youngip, Alaskamit Amerikami inatsisartunut ilaasortaasup siunnersuutigilersaarpaa, Alaskami Sullualummut isaariaanut qanittumi itisuumik umiarsualiviliortoqassasoq, nutaarsiassaqartitsivimmi Canwestimi taama nalunaaruteqartoqarpoq.
Inatsisissatut siunnersuut pillugu oqalugiarnermini Don Youngip oqaatigaa, nunat allat nunanut issittunut soqutiginnileraluttuinnartillugit, USA-p soqutigisai piumasaqaataalu illersorneqartariaqartut.
Qeqertaaluup avannaani illoqarfiup Nanisiviup eqqaani itisuumik umiarsualiviliornissamik Canada maannamut pilersaaruteqareerpoq. Maannalu apeqqutaaginnalerpoq, kikkut siulliullutik itisuumik umiarsualiviliussanersut. Aamma Canadamiut peqqussutaat najoqqutaralugu umiarsuit anginerusut tamarmik Canadap imartaanut pisut, Canadami imartanut oqartussaasunut nalunaarutigineqartussaammata, nunat taakku akornanni aaqqiagiikkunnaartoqalersinnaavoq.
