Sullissiviup Nuup aningaasaqarnera nakkutigisaalerpoq
Nuup kommuneata suliffissaqartitsiniarnermut sullissiviata Sullissiviup Nuup aningaasaqarnikkut aqunneqarnera kommunnemit aggustip naaneraniilli tiguneqarpoq paasineqarmat sullissivimmi ukioq mannamut aningaasaqarnikkut missingersuutit akimorlugit aningaasanik atuisoqarsimasoq.
Nuummi kommunalbestyrelse ataasinngorpat septembarip 26-iani ataatsimiilerpat oqaluserisassanut ilaavoq Sullissiviup Nuup aallartikkamili qaammatini arfineq pingasuni ingerlanneqarnermini aningaasatigut aqunneqarnera.
Sullissivik Nuuk, Nuup kommuneani suliffissaaleqisut ataavartumik sammisassaqartinneqarnissaat pillugu sullissiviusoq ukioq manna aningaasartuutigineqarnerusussanngorpoq, aningaasartuutissatut missingersuutaareersut akimorlugit ilaatigut ingerlatsinikkut atuisoqarsimammat.
Sullissivik Nuummi ukioq manna aningaasartuutissatut 13,5 million koruuninut missingersuutaasut aggustip naanerani atorneqareersimapput. Tamanna pillugu Nuummi kommunalbestyrelsep ataasinngorpat ataatsimiileruni Sullissivik Nuummut immikkut 1,2 million koruuninik aningaasaliissutissaqarnissaq oqaluuserissavaa.
Sullissivik Nuummi allaffiit pisatsersorneqarnerat aningaasanik atuivallaarsimanermut pissutaavoq.
Allaffiit pisatsersorneqarnissaannut aningaasanut missingersuummi 54.000 koruunit atugassanngortinneqarsimapput, 552.000 koruunilli atorneqarsimallutik. Ilaatigut 254.000 koruuninut biilisisoqarsimalluni.
Aningaasanik atugassanik sippuinermut ammeriviutit tunisaqarluarsimannginnerat amminillu tunisat amerleriarujussuarsimanerat aamma peqqutaaqataapput.
Tamanna pillugu Sullissivimmi pikkorissartitsisarnerit nammineq sulisunik pikkorissartitsisoqarluni massakkumiit ingerlanneqartalernissaat ammeriviillu Kittat minillugu tuniniarneqarnissaat kiisalu amminik tunisinerup unitsinneqarallarnissaa Nuup kommuneanit siunniunneqarpoq.
Nuup kommuneani suliffissaqartitsiniarnermut inuussutissariornermullu ataatsimiititaliat Sullissivik Nuummut immikkut aningaasaliissuteqartoqarnissaanut innersuussipput, tamannalu tassa Nuup kommunalbestyrelseata ataasinngorpat ataatsimmiinnerani oqaluuserineqassaaq.
