Suliunnaarallartinneqartut paarlatsitut sulisinnaalissapput
Ikiorsiissutinik pisartagaqarnermut pisinnaatitsineq annaanngikkaluarlugu piffissami sivikitsumi sulisinnaanermut periarfissaq Naalakkersuisut atuutilersinniarpaat.
Suliffeerunnermi ikiorsiissutinik pisartagaqartut piffissami sivikitsumi paarlatsitut sulinissamut neqeroorfigineqartut suliffeerunnermi ikiorsiissutinik pisartagaqarnertik annaasaaraat paasineqarpoq.
Inussutissarsiornermut Aatsitassanullu Naalakkersuisoq Jens Erik Kirkegaard suliffeerunnermi ikiorsiissutit pillugit inatsissatut siunnersummi ullumi inatsisartut ataatsimiinneranni saqqummiunneqartussami ilaatigut ima allappoq.
- Tamanna ajornartorsiutaavoq, suliffiimmi taamaattuukkajuttarput, assersuutigalugulu sapertunik paaqqinnittarfinni paarlattaasussanik pissarsisinnaannginneq
inuiaqatigiit ajornartorsiutigilersarpaat. Taamaammat siunnersuummi aalajangersakkamik ilanngussisoqarsimavoq, suliffeerunnermi ikiorsiissutinik pissarsisartut piffissap suliiffeerunnermi ikiorsiissutinik pissarsisarnerup nalaani ulluni ataasiakkaani akissarsiaqarluni isertitaqarsimagaanni suliffeerunnermi ikiorsiissutinik pissarsisinnaaneq annaasaqaatigineqassanngitsoq, inuussutissarsiornermut Naalakkersuisoq taama allappoq.
Sulisartut suliffissuarni sulinerup unitsinneqarnera pissutigalugu angerlartinnneqartut ikiorsiissutinik pisartagaqarnertik annaasinnaajunnaarnissaat Naalakkersuisut qulakkeerniarpaat.