Suliumajunnaartut juullimut tusarnaartitsineq eqqorsinnaavaat
Teknikerit peqatigiiffiata Attaveqaatip suliumajunnaartitsinerata sapaatiuppat Nuummi Hans Egedep oqaluffiani tusarnaartitsinissaq eqqortussanngorunarpaa. Pilersaarutit malillugit tusarnaartitsineq ingerlanneqassaaq, kisianni toqqaannartumik KNR-TV-kkut aallakaatinneqassanani.
- Atortorissaaruserisut service teknikerit Attaveqaammi ilaasortat suliumajunnaartunut ilaapput. Taakku toqqaannartumik tv-kkut aallartitsinermut atortunik ikkussuisarput taakkuli ilaasortaqatitik allat assigalugit suliumajunnaarput, KNR-TV-mi aallakaatitassiornermut pisortaq Jan Berg ilisimatitsivoq.
Taamaakkaluartoq tusarnaartitsineq KNR radiokkut toqqaannartumik aallakaatinneqassaaq KNR-TV-millu immiunneqassaaq juullikkunni aallakaatinneqartussamik.
Hans Egedep oqaluffiani inissat 450-upput matullu matuneqassapput inissat ulikkaarpata.
- Ilagiit sinniisaat nalunaarput qatserisartut matumi paarsisuujumaartut inissallu ulikkaarpata taakku matut matujumaarpaat, Domprovst Isak Davidsen KNR-imut oqarpoq.
Hans Egedep oqaluffiani tusarnaartitsineq sapaatiuppat nalunaaqutaq sisamanut aallartippat toqqaannartumik radiokkut aallakaatinneqassaaq.