Suliumajunnaartut arlallit sulinertik nangippaat
Suliumajunnaarneq sapaatip akunnerata ataatsip matuma siornagut aallartimmalli, peqqissaasut tuusintingajaat suliumajunnaarnertik unitsiinnarlugu suliartoqqusaasarsimapput, tassa sillimaniarnissaq eqqarsaatigalugu napparsimmavinni sulisut ikippallaartutut oqaatigineqarmata.
Peqqissaasut kattuffiata, Dansk Sygeplejerådip kisitsisaataasa nutaanerit ersersippaat, peqqissaasut suliumajunnaartut pingasuugaangata, pingajuat suliartortariaqartartoq.
Peqqissaasut nakorsaatinik suliaqartut eqqugaanerpaapput, taakkumi 60 procentii suliartoqquneqartariaqarsimagamik. Tamanna peqqissaasut ulluinnarni qanoq pisariaqartinneqartiginerannut takussutissaasoq, peqqissaasut kattuffianni siulittaasup tulliata Dorte Steenbergip oqaatigaa.
Naak immikkoortortaqarfiit arlalissuit ulluni tulliuttuni suliumajunnaarnermut ilaasinnaajunnaaraluartut, suliumajunaarneq malugineqarluarsinnaassaaq, tassami ingammik pilatsinnissat pilersaarutaareersut taamaatiinnarneqartussaammata.
