Pisiffimmi tuniniaanermut pisortap, Per Steen Larsenip, oqaatigaa, Pisiffik nioqqutissanik tonsinik sisamanik oqimaassusilinnik immikkut pisiniarsimasoq taakkulu ulluni tullerni tikisinneqarumaartut oqaluttuaralugu.
- Nioqqutissat tikisissinnaasagut amerlanerpaat pisiariniarsimavavut, soorlu qallersuutissat, immuliorfinni nioqqutissiat naatitallu ajortianerit. Nioqqutissat tonsinik sisamanik oqimaassusillit suliumajunnaartoqannginnerani Pisiffiit pisiniarfiinut apuunneqarsinnaanerat naatsorsuutigaarput, Per Steen Larsen oqarpoq.
- Taama sivikitsigisumik piffissaqarluta suna tamaat pissarsiarisinnaanngilarput pisisartuttali aaqqiagiinnginnermik malugisaqannginnissaat anguniarlugu iliuuseqarniarsimavugut. Aaqqiagiinnginnermut akuliutinngikkaluarluta tamassuma sivikinaarnissaa neriuutigaarput, Pisiffimmi tuniniaanermut pisortaq oqarpoq.
Aamma Brugseni qallersuutissanik naatitanillu immikkut piniarsimasoq taakkulu pingasunngornermi tikiunneqarumaartut Brugsenimi sulisoqarnermut pisortaq, Carsten Olsen, oqarpoq.
- Akikillisanilli tuniniagassavut umiarsuakkut tikisitaapput aaqqiagiinnginnerlu sivisunaassanngippat Brugsenimi pisisartut suliumajunnaarnermik malugisaqarnissaat qularaarput, Carsten Olsen eqqissisaavoq.