Sulisut 25-t soraarsinneqarsinnaapput
- Soraarsinneqartussat kikkuunissaat sumilluunnit suli eqqartorneqanngilaq. Sulinermut atatillugu isumaqatigiissutaat kattuffiillu ilaasortaaffigisaat apeqqutaajumaarput, pisortaaneq Michael Binzer oqarpoq.
Sulisut 25-it soraarsinneqartussanngorsinnaasut tassaapput mekanikerit, pilotit aamma saqisut, kiisalu Kununnguup angallassineranut atatillugu Mittarfinni sulisut.
Nunarsuarmi aningaasaqarnerup ajornartorsiutaanera unammillerneqarnerulernerullu kinguneranik timmisartuutileqatigiiffiup ukiumut kaaviaartitai, angalasui assartugaalu ukiuni arlalinni amerliartorsimariarlutik, maanna ikiliartulersimapput.
Kunuunnguup tunineratigut timmisartunik Dash 8-inik marlunnik, tamarmik immikkut 37-inik ilaasoqarsinnaasunik, pisinikkut Air Greenlandip ukiumut 30 millioni koruunit siunissami sipaartalissallugit ilimagaa.
Aningaasartuutit qaffakkiartortut, isertitat ikiliartortut aammalu Narsarsuup - Københavnillu akornanni angallaffioruttornerani unammilleqatigiikkaluttuinnarneq pissutigalugit Air Greenlandip timmisartorsuaq Boeing 757 tunisariaqalerlugu, Michael Binzerip erseqqissaatigaa.
- Nunap iluani angallassinitsinni ilaasut 5 procentimik, Atlandtikoq ikaarlugu angalasut 6 procentimik assartukkallu 10 procentimik ikileriarsimapput, taamaammat allannguinissarput pisariaqarluinnarpoq, Michael Binzer nassuiaavoq.
Air Greenlandip kaaviaartitai siorna 1,2 milliardi koruuniusimapput, ukiorlu taanna ilaasut 410.000-t timmisartuunneqarsimapput.
Narsarsuarmiit Københavnimut Boeingip timmisartuussisarnerani Air Greenland ukiumut 10-15 millioni koruunit ukiuni arlalinni kingullerni amigartoorutigisarpai.
Narsarsuarmulli silaannakkut angallassineq aasaanerani ingerlaannassaaq. Air Greenland angallaffioruttulernerani timmisartumik kujataanit Danmarkiliartartussamik 2011-ip aasaani attartortalissaaq. Angallaffioruttorneq qaangiukkaangat Dash 8-t marluk pisiani Narsarsuarmiit Kangerlussuarmut maannakkumit akulikinnerusumik uteqattaartittalissavai, kujataanit angalaniat taamaalillutik angallanneqartuarsinnaaqqullugit. Aamma ulluinnarlugu angalasinnaanngorunik angalasut Nuummi Kangerlussuarmiluunniit unnuisariaarutissapput.
- Kujataanit timmisartumik angalaniat pitsaanerusumik sullinneqalissapput, soorlu aamma aasaanerani bilitsit akikinnerulissasut, Michael Binzer nassuiaavoq.
Michael Binzer timmisartuutileqatigiiffinnik allanik unammillerteqalernertik peqqinnaartuunerarpaa, eqqaamaqquaali nunatta suliffinnik annaagaangagu, akileraarutit isertitassaagaluit ilinniarfissallu annaaneqartartut.
