Sulisussaaleqineq ullormut 1 million koruuninik annaasaqaataasarpoq
Qalerallinik tunisassiorfik Halibut Greenland aasaanerani arlaleriarluni tunisinermik unitsitsisariaqartarsimavoq. Tamanna pisarpoq sulisussaaleqineq pissutigalugu - naak Ilulissani suliffissaaleqisutut inuit 149-ut nalunaarsorneqarsimagaluartut.
- Tamanna pissutigalugu allatut ajornartumik inuit suliffissamik innersuunneqaraluarlutik suliumanngiittuassappata isumaliutigilerparput sulisussanik tikisitsisalernissarput, Halibut Greenlandimi pisortaq Niels Thomsen KNR-imut oqarpoq.
Halibut Greenland Ilulissani suliffissarsiuussisarfimmut nalunaarsimagaluarpoq sulisussanik 15-nik amigaateqarluni sisamaannaalli takkussimapput. Taama pisoqarnerata kingorna Halibut Greenlandimut politikkerinut akisussaasunut kaammattuuteqarpoq.
Halibut Greenlandip piumsaraa isumaginninnermut pisartakkanik tunniussisarnermut malittarisassat sukaterneqarnissaat. Taamalu kaammattuuteqarneq takkuppoq isumaginninnermut aningaasartuutit tunniunneqartartut amerliartorneranni.
- Apeqquterujussuuvormi inuit suliffissaaleqisutut nalunaarsorneqarsimasut ilumut suliffissaaleqivissornersut. Ilumoorsinnaanngilarmi politikkerit suliffissaaleqisoqarnera pillugu oqaluttut illuanik uagut sulisussaaleqineq pissutigalugu aalisarluaruttulerfimmi tunisinermik unitsitsisariaqartarnerput, Niels Thomsen oqarpoq.
- Ullormut 1 millioner koruunit annaasarpagut tunisineq matusariaqaleraangat. Suliffeqarfippullu kisimi aningaasanik taakkuninnga annaasaqartuunngilaq. Tassa pisisinnaassuseq illoqarfimmi kaaviiaartitanik qaffassaaqataasinnaagaluartoq annaaneqartarpoq kommunelu aamma aningaasarpassuarnik tassani annaasaqartarluni, Niels Thomsen oqarpoq.
- Assorujussuaq pakatsissutigaara suliffissaaleqisunik taagorut akiligassaat pisortanit akilerneqartarmata naak immaqa uffa taakku suliffissamik innersuunneqaraluarlutik suliumanngitsut. Allaammi ilaatigut illoqarfimmi biilinik angalaarluta inuit naapitakka apersorlugit sulisussarsiortariaqartarpunga, Halibut Greenlandimi pisortaq oqarpoq.
Taamaattumik taassuma kaammattuutigaa inuit suliffissamik innersuunneqaraluarlutik suliumanngitsut akiligassaat kommunimit akilerneqartarunnaassasut
Halibut Greenland maanna misissuilereerpoq aappaagu aalisarlualerfimmi aalisakkerisussanik tikisitsinissaminut. Taakku nunaqavissunut aningaasarsiassatut neqeroorutigineqartut assigannik neqeroorfigineqassapput
- Apeqqutaanngilaq sulisartoq kangianeersuunersoq imaluunniit Europamiuunersoq. Pingaarnersaavoq ullaakkut makissinnaanissaaa suliakkiissutinillu naammassinnissinnaanissaa, Niels Thomsen oqarpoq.
