Sulisoqarnermi aaqqissuusseqqinneq pinngitsaaliissutigineqartoq
Nutaamik aaqqissuussineq ileqqaarniutissatut pilersaaruteqarnermi pigeqqaagassaavoq, Spania Grækenlandisulli atugaqalinnginnissaa pinngitsoorneqassappat.
Spaniami sulisoqarnikkut suleqatigiit juunip 16-iannut piffissalerneqarput. Naalakkersuisut taamaalinerani sulisoqarnermik aaqqissuusseqqinnissaq pillugu inatsit akuersissutigissavaat, kattuffiup sulisitsisullu akornanni isumaqatigiissuteqarsimaneq ilaatillugu ilaatinnaguluunniit, ministerpræsident José Luis Rodriguez Zapatero oqarpoq.
Tamanna sapiillisaarneruvoq annertooq, tassami Zapaterop sulisartut kattuffeqarfii ataatsimoortut akerlerilersinnaammagit, ileqqaarniutitullu pilersaarut Spaniap aningaasaqarniarneranik iluarsisitsisussaq eqqarsaatigalugu tamanna ajornartorsiutinngoratarsinnaalluni.
Ileqqaarniutitut pilersaarut EU-kommissionimit piumasaqaatigineqarpoq ileqqaarniutillu Spaniap Grækenlandisulli aningaasaqarnikkut nakkaattoornissaa, taamalu euromik aningaasaqarfiit ulorianartorsiortinneqarnissaat, pinngitsoortissallugu.
Zapaterop juunip 16-iat piffissaliuppaa, tassami aqaguani EU-mi qullersat ataatsimiinnertik Spaniap siulittaasuunerani kingullerpaamik ammassammassuk. Naalakkersuisunullu pingaaruteqarpoq kommissionimut akiligassaqarfinnullu takutissallugu naalakkersuisut iliuuseqarsinnaasut pissutsinillu nakkutiginnittut.
Ajornartorsiulli unaaginnarpoq, isumaqatigiissuteqarallarneq sulisartut kattuffissuisa angisuut marluk, naalakkersuisunik illersuisup UGT-p saamerliuniarnerusullu akornanni ajornartorsiutaasutut sunniuteqarsinnaammat, tassami naalakkersuisut aningaasaqarnikkut annaassiniutissatut pilersaarutaat taakkua isumalluarfiginngivimmassuk. Taakkuami arlaleriarlutik erseqqissartarsimavaat sulisoqarnermi akuersaarneqarsinnaasumik aaqqissuusseqqittoqanngippat, ajornartoornermi aaqqiissutissaq ataatsimoortoq qularnanngitsumik ilassilluarneqarsinnaanngimmat.
Kattuffiit siulittaasuisa suliumajunnaartoqarnissaa oqaatigimisaartarpaat. Aaqqissuusseqqinnissami pingaarutilik tassaavoq sulisut ajornannginnerusumik akikinnerusumillu soraarsinneqartarnissaat imaluunniit sulisoqarnerup eqaannerulersinneqartarneranik taaneqartartumik.
Naalakkersuisut neriuutigaat sulisoqarnermi kisitsisit isumalluarnartut sulisartut kattuffeqarfiinik piuminarnerulersitsissasut. Spaniami suliffissaaleqisut maajimi 76.000-inik ikileriarsimapput.
