Sulisooreersut pilersaarusioqataatissavaat
Sulisooreersut pilersaarusiornermi tusarniarneqarnissaat pingaaruteqarluinnartoq, Air Greenlandimi ittuuninngortussaq Michael Binzer, juunip aallaqqaataani atorfinittussaq oqarpoq.
Nunatsinni ilisimaneqareersoq, Air Greenlandimilu sulisareersoq maanna SAS-ip tuniniaaviani pisortaasoq 38-inik ukiulik Michael Binzer, juunip aallaqqaataani Air Greenlandimi pisortanngussaaq. Michael Binzer suut piffissami siullermi suliariniarnerai aperiganni ima akivoq:
-Pilersaarpunga suleqatit apersornerinut tusarniaaviginerinullu piffissaq siulleq atussallugu, tassa ullut siulliit 100-t apersuinermut pilersaarutissallu nutaap allanneranut atorniarpakka. Pilersaarut allallugu naammassippat siulersuisunut siullermik saqqummiunneqassaaq, kingornatigullu sulisunut aamma saqqummiunneqassalluni.
- Isumaqarpunga pilersaarusiulinnginnermi pingaaruteqarluinnartoq sulisooreersut tusaaniarneqarnissaat - taakkuuppummi ulluinnarni amigaataasinnaasunik ilisimanittut aamma taakuupput suut siulliullugit suliarineqarsinnaanersunik ilisimannittut, soorunamilu aamma eqqarsaatersuutikka isumassarsiakkalu aamma pilersaarusiornissami atorneqassapput Michael Binzer radioaviisimut taama ullumi oqarpoq.
Michael Binzer nulialu Caroline meeraallu marluk piffissaq siulleq nuunngikkallassapput - nuliata ilinniarnini naammasseqqaassammagu.
