Sulisitsisut Peqatigiiffiata Greenpeace kamaappaa
- Nunat sanilitta ukiuni qulikkuutaani nunarsuarmi tamarmi qillerinerni uuliamik piiareersut aammalu aningaasaqarnikkut ineriartornissaminnut inuulluataarnissaminnullu nukissamik pissarsereersut, uuliaqarneranik misissuisoqaannalersorlu Kalaallit Nunaata unitsinniarneqarnera ingasappallaaqaaq, Henrik Leth Weekendaviisimi atuartartut allagaannut allappoq.
Taanna isumaqarpoq naleqquttuunngitsoq Kalaallit Nunaat aningaasarsiornikkut ineriartorniarluni ikummatissanik isumalluuteqarniarneranik unnerluutigissallugu eqqaasitsissutigalugulu Kalaallit Nunaata erngup nukinganit innaallagissiorfiit sananeqarnissaannut millionerpassuarnik atuimmat.
Greenpeacep misiliilluni qillerinernik unitsitsiniarnerani kalaallit inuiattut ikioriarfeqanngitsutut uuliasiornerullu kingunerisinnaasaannik eqqarsaatiginnilluarsinnaanngitsutut saqqummiunneqarput, taanna taama allappoq.
Taassuma kissaatigaa Danmarkimi inuit amerlanerusut Kalaallit Nunaanni pissutsinik ilisimasaqarluarnerunissaat, taanna atuartartut allagaanni taama allappoq.
