Sulisitsisut Peqatigiiffiat nangaasumik akuersaarpoq
Kalaallit Nunaanni Sulisitsisut Seqatigiiffianni pisortap Henrik Lethip pisanik elektroniskiusumik nalunaarsuisalernissamik pisariillisaanissamut periarfissatsialaanerarpaa.
- Pisanik e-mailikkut nakkutiginnittunut nalunaarsuisinnaanngornissaq ulluinnarni atuisunut pisariillisaataassaqaaq, tassami nakkutilliisut pappiaqqaniit nussuisarnerat pisariaarutissammat, toqqaannartumillu qarasaasiamut ikiinnarsinnaanngussagamikku. Aamma aalisariutaatillit namminneq akiliuteqartalernissaat Henrik Lethimut ajornartorsiutaanngilaq:
- Akiliuteqartalerneq sunaluunniit soorunami kimulluunniit nuannersuinnaanngilaq, unali akiliutaasalertussaq assersuutigalugu raajanut akitsuusiinermiit akueriuminarneruvoq, Henrik Leth oqarpoq.
Aappaagu akiliutaasalertussat imatut isikkoqarput: Raajat tonsimut 60 koruunit, assagiarsunniarnermut, aalisakkanullu assigiinngitsunut pisaqarsinnaanermut akuersissut ataaseq 1.500 koruuneqalissaaq, umiatsiaararsortullu aalajangersimasumik ukiumut immikkut 1.500 koruuninik akiliuteqartalissallutik, tamakkulu Henrik Lethip isumaa malillugu atuisunit akilerneqarsinnaassangatippai:
- Tassa agguaqatigiisillugu kiilumut 6 ørinik akiliuteqartassapput, ingasagisassaanngikkaluartorlumi ukiumut 10 milliun tonsit pisarineqarpata aningaasarpaalunngussapput, taakkulu kilisaatinut avataasiortunut annernarnavianngilaq, naak sinerissamut qanittumi aalisartunut akigititaasut minneruneri pissutaallutik ajornartorsiutaasinnaagaluartut, Henrik Leth oqarpoq.
Maleruagassat nutaat pissutaallutik naalakkersuisut kilisaatit aalisariutaatillillu aningaasaqarniarnerannut ingerlanneqarneranullu nakkutiginnilluarsinnaanngornermik kinguneqassaaq. Tamannalu Henrik Lethip ima oqaaseqarfigaa:
- Paasissutissanik tunniussisarnissarput imatut ajorinngilarput, tassami siornatigut paasissutissanik tunniussiniartarnerput pisariusimaqaaq, paasissutissallumi tamakkorpiaat qanoq iliuuseqarfigisinnaanerlugit oqaloqatigiissutigisinnaassagatsigit pitsaaneruvoq, tassami aningaasartuutissat taamaalilluta siumut missingersorsinnaanerulissavagut, paasissutaasussallu pisariaqartinneqartut tunniutipallassinnaanerulissallutigit. Ilami qaammatit kingulliit ingerlanerini inuit apeqqutigisimasartik ilaatigut pingasoriarlutik apeqqutigeqqittarmassuk, taamaammat pilersinneqartussami paasissutissat nassaariuminarnerulernerannik kinguneqarnissaa neriuutigaarput, taama Nunatsinni Sulisitsisut kattuffianneersup Henrik Lethip suleqatitsinnut oqaaseqarpoq.
Nakkutilliinermi maleruagassat januarip aallaqqaataani atuutilernissaat naatsorsuutigineqarpoq. Nakkutilliinermullu aalisartut akiliutigisartagassaat 12 million koruuniunissaat naatsersuutigineqarpoq.
