Sulisitsisut Peqatigiiffiat: Namminersornerullutik Oqartussat amerlanerusunik ilinniartoqarsinnaagaluarput
Kalaallit suliffeqarfiutillit, soorlu sanaartornermut tunngasunik suliffiit, ilinniartuuteqarnissaminnut suliffimmillu misiliisunik sulisoqartarnissaminnut inatsisit unioqqutinneqartarnerannik oqaluttarnerit tutsuiginangillat, Sulisitsisut Peqatigiiffianni pisortaq, Ole Rud Oqarpoq.
“Akerlianilli Sulisitsisut Peqatigiiffiannit uppernarsarsinnaavarput inatsisit uagut maleqqissaarlutigit. Isornarsinnaasortaa Namminersornerullutik Oqartussat qullersaqarfiiniippoq. Qullersaqarfiimmi 14-iusut siorna qulingiluaannarnik ilinniartuuteqarmata, Ole Rud isornartorsiorneqarnerminnut tunngatillugu oqarpoq.
Kalaallit Nunaanni suliffeqarfiit angisuut kalaallinik inuusuttunik ilinniartoqarneq ajortut, radioaviisikkut Ilimmarfiliami pissutsinik ilanngutassiassinni ippassaq oqartusi tusaavara. Tassunga tunngatillugu oqartariaqarpunga paasiniaalluanngitsusi. Eqqorpoq suliassiissutit angisuut eqqarsaatigalugit ilinniartuuteqarnissaq piumasarineqarmat, kisianni malittarisassat pineqartut 2007-imi aatsaat atulersinneqarput. Ilimmarfiliassamillu suliarinnittussarsiorneq eqqaamanerlunngikkukku 2005-imili pivoq, taamanikkullu malittarisassaq pineqartoq suli atuutilinngilaq, tassa oqartoqarsinnaanngilaq suliffeqarfiit Ilimmarfiup sananeqarneranik suliallit, nunap inatsisaanik unioqqutitsisut.
Ullumikkut piviusut eqqartussagaanni Sulisitsisut Peqatigiiffianni inatsisit maleqqissaarlugit ingerlapput. Nittartakkatsinni atuarneqarsinnaavoq misissuisitsinitsinni paasisimagipput ilinniartut affaat Sulisitsisuni ilaasortatsinnit ilinniartuutigineqartut, namminersorlutillu suliffeqarfiit ataatsimut katillugit ilinniartut 75 procentii ilinniartuutigisaraat. Taamaalilluta oqarsinnaavugut pisortat suliffeqarfiutaat ilinniartuuteqarpiarneq ajortut, ingammik Namminersornerullutik Oqartuassat. Misissuinittami takutippaa siorna ilinniartut 526-usut akornanni qulingiluaannaat Namminersornerullutik Oqartussani ilinniartuusimasut. Kommunillu eqqaassagaanni isumaqarpunga taakku 70-it missaanni ilinniartuuteqartut, Sulisitsisut Peqatigiiffiani pisortaq
Ole Rud oqarpoq.
