Sulisitsisut Kattuffiat: Meeqqat atuarfiat sipaarniarfiginagu
Meeqqat atuarfiini atuartut piginnaasakinnerat oqaatsitigullu sapersartarnerat nunatsinni sulisoqarniarnermut sunniuteqarnerluttartoq Kalaallit Nunaanni sulisitsisut peqatigiiffiat, GA, isumaqarpoq.
Allattoq Louise M. Kleemann
novembarip 03-at 2008 13:45
Inuusuttut amerlanerujartuinnartut suliffeqarfimmi sulisinnaanermut tunngaviusumik piumasaqaatit naammassisinnaanngikkaat, Kalaallit Nunaanni sulisitsisut peqatigiiffianni siulersuisut ernumassutigaat.
- Meeqqat atuarfiini ajornartorsiorneq politikerinit akisussaasunit paasiumaneqanngippat, taava GA-p ilaasortaanut pissutsit ajornerpaaffissaminnut pisimassapput, taama sulisitsisut peqatigiiffiat tusagassiuutitigut nalunaarummini allappoq.
Kalaallit Nunaanni sulisitsisut peqatigiiffiata politikerit qinikkat kalaallit inuusuttortaannik tapersersuinertik takutillugu aningaasanut inatsit pillugu isumaqatigiinniarnissami sukataaqqullugit kaammattorpai.
