Sulisitsisut Kattuffiat: Biologit tusaaniarneqarnerusariaqarput

Naalakkersuisunngortussat biologit inassutaanik malinninngippata raajat avammut tunisassiarineqartut avataaniit pisiariumaneqarunnaariaanaapput.

Nunarsuarmi kattuffiit atuisullu piumasarilernikuuaat tunisassiarineqartut meqqimik nalunaaqutserneqartarnissaat, tassa nungusaataanngitsumik pisarineqarsimanerannik uppernarsaataasumik. Meeqqi "Marine Stewardship Council"-imik taaguuteqarpoq.

Naalakkersuisunnngortussat inatsisartussanngortussallu Sulisitsisut Kattuffianit suliassanik ataqatigiissaarisumit, Jens K. Lyberth-imit kaammattorneqarput nungusaataanngitsumik aalisarnermut soqutigisaqaqatigiinnut suleqateqarnerulernissartik anguniassagaat akerlerisutullu isiginaveersaarlugit.

- Raajarniarneq nungusaataanngitsumik ingerlanneqartussaavoq, avatangiisinut sunniutit aalisarnerup sunniutigisai aamma annikinnerpaatinniarsarineqartussaapput naalakkersuisoqarfimmilu aqutsineq pitsaanerulertariaqartoq kaammattuutigaarput.

MSC-minngaaniit (Marine Stewardship Council) akuersissummik pinissaq pingaaruteqarluinnartoq nalunaarutigereerpaat.

Avatangiisinut tunngasunik suliaqartut 2008-imi raajarniarneq pillugu, biologit appaanissamut innersuutaat fiskerirådillu aqqutigalugu aalisarnermut suliallit innersuutaat, maluginngitsoorneqarsimapput. Taakkunanngaaniillu innersuutigineqartumit annikinnerusumik naalakkersuisut appaanerat tupigineqartorujussuuvoq. Taamatut aalajangiinermi tunngavilersuutit taamanikkut amigaatigineqarsimapput. Taamaattumik naalakkersuisunngortussat kaammattuorusuppagut tamakku avataaninngaaniit piumasaqaatit timitalerniarneqarneranni suleqataanissaat, Jens K. Lyberth oqarpoq nangillunilu:

- Ajornerpaassaaq massakkut niueqatigut oqassappata 'taamatut meqqimik akuersissummik pisimanngikkussi niueqatigisinnaanngilassi'. Taava kingunerisussaassavaa tunisassiassaatigut allamut tuniniartussanngorlugit. Ajoraluartumik imaasinnaavoq suli akikinnerusumik tunisariaqalersinnaagigut, tamannalu aningaasarsiornikkut annertungaatsiartumik sunniuteqarsinnaanera annilaangatigivarput, Sulisitsisut Kattuffianni suliassanik ataqatigiissaarisoq, Jens K. Lyberth naggasiivoq.