Sulisinnaajunnaarnersiutit qaffanniarneqanngillat
Utoqqalinersiat qaffanneqarnissaat ilimanaateqaraluartoq sulisinnaajunnaarnersiutit qaffanniarneqanngillat.
Utoqqalinersiat allanngortinneqarnissaannut atatillugu sulisinnaajunnaarnersiutit allanngortinniarneqanngillat.
- Tamatumunnga atatillugu isiginiarneqarput sulisinnaajunnaarnersiutillit ataatsimut isigalugit sulisinnaasunik ilaqarmata, sulisinnaajunnaarnersiuteqartunut ataasiakkaanut inuiaqatigiinnullu iluaqutaasumik atorluarneqarnerusinnaasunik, naalakkersuisunut ilaasortaq Aleqa Hammond oqarpoq.
Tassa Naalakkersuisut isumaqarput sulisinnaajunnaarnersiutillit amerlanerpaat immaqalu inuusunnerusut, inuuniarnerat pitsanngorsaavigineqarsinnaasoq, pikkorissartinnerisigut, qajassuuttariaqartunik suliaqartinnerisigut aamma allanik ilinniarteqqinnerisigut, ikiorsiissutinik pisartagaqartiinnarnagit.
Sulisinnaajunnaarnersiutit tunngaviusumik ukiumut 88.812 koruuniupput taakkualu naleqqussarneqartarlutik allanik isertitaqarneq apeqqutaatillugu kiisalu inuttut tapit meeraqarnerlu apeqqutaatillugit.
