Sulisartut nipaarussimapput

Sulisartut ulluanni Nuummi katersortarfimmi oqalugiartunut tusarnaariaqataasimavoq Lars K. S. Olsen. Taanna sulisartut kattuffiata suliniutaanik maqaasisaqarnerarpoq tammannalu pillugu kaammatuuteqarluni. Lars K.S. Olsen ima siullermik isummersorpoq:

- Assorsuaq maqaasivara qanga soorlu 1970-kkunni Sisimiuni ullorsioraangata inuppassuit nilliarrallutik nuannallutik anguniagaqarlutik pisut.

Oqalugiartut uparuarpai:

- Massakkut maluginiarpara atuaannavipput, tamarmik atuarput. Isumaqarpunga sulisartut peqataatinneqarpallaanngitsut tusarnaariaannartut massakkut pissuseqarput. Isumaqarpungattaaq SIK-p takorluugai amigaataasorujussuusut. Assersuutigalugu SIK kattuffeqarpoq aamma Højskoleqarput, kisianni taakku sumut atorpaat? Uangaluunniit naluara atortarnersut, tusagaqarneq ajorpugut. Namminersornerullutik Oqartussat suliffeqarfippassuarminik tunioraanerani SIK anguniagaqarnerusariaqartoq Lars K. S. Olsen isumaqarpoq.

- Kikkunngooq pisiarissavaat? Taava utaqqinnarsinnaavugut nunanit allaneersunit pisiarineqaannassammata. SIK imaaliorsinnaagaluarpoq, sulisartunik piginneqatigiittarneq pillugu pikkorissaalluni, kisianni tamaattoqannginnami. Pisiarineqarpataasiit naammagittaalliussaaq. Tassa namminneq takorluugaqarnissaat amigaataavoq.