Sulisartunik annaassiniarnissaq piariilerpoq
Kanngussammik piiaaffimmi nakkaassimasumi 622 meterinik itissusilimmi sulisartut, aggustip tallimaannili mattussaaqqapput.
Annaassiniarnermik suliaqartut piiaaffimmi sulisartut issimaffigisaanut qillerillutik arfininngormat anngupput, taamanimiilli annaassiniartut sulluliap annaassiniarnermi atorneqartussap qulaatungaa 100 meterinik itissuseqartup aqitsuusullu manngertisarnissaa suliarilerpaat.
Sulluliap iigaata saviminernik qajannaallisarneratigut, annaassiniarnermi qaqitsissutigineqartussap ammukartinneqarnerani, sulluliap nakkaattuunnginnissaa anguniarneqarpoq.
Marlunngornerup pingasunngornerullu unnuaani, piiaaffimmi sulisartut 33-usut qaqinniarneqarnerat aallartissasoq, Chilemi aatsitassarsiornermut ministeri Laurence Golborne ilisimatitsivoq.
Annaassiniarnermi qaqitsissutigineqartussaq, Chilemiut sakkutuuisa suliaraat, sulisartorlu ataaseq nalunaaquttap akunnerata aappaata affaani marlunniluunniit qaqinniarneqartassalluni.
Annaassiniarnermi qaqitsissutigineqartussaq, sulluliakkut annaassiniarnermi atorneqartussakkut maanna inuttaqartinnagu misileqattaarneqaleruttorpoq.
